SANZJONIJIET SIMBOLIĊI KONTRA SPANJA U L-PORTUGALL

Il-Ministri tal-ECOFIN fetħu l-prospetti ta’ sanzjonijiet finanzjarji kontra Spanja u l-Portugall  li ma osservawx ir-regoli tal-Budget bejn 2013-2015. L-istess Ministri huma mħassba li dawn is-sanzjonijiet jistgħu jkomplu jgħattnu liż-żewġ pajjiżi Iberiċi u jkomplu jrewħu l-mewġa ta’ ewroxettiċiżmu fl-istess pajjiżi.

Il-Kunsill tal-Ministri nnota li Spanja u l-Portugall ma addottawx miżuri effettivi  bejn 2013-2015 fuq livell Ewropew. Dan jista’ jwassal għal sanzjonijiet finanzjarji kontra ż-żewġ pajjiżi li jkunu multi finanzjarji sa 0.2% tal-Prodott Gross Nazzjonali. Is-sanzjonijiet jistgħu jinkludu wkoll l-iffriżar tal-fondi strutturali Ewropej.

Din id-deċiżjoni ntlaqgħet tajjeb mill-Ġermanja, l-Olanda u l-Finlandja li jaqblu mal-osservanza tar-regoli. Id-deċiżjoni hija wkoll twissija għal pajjiżi oħra taż-żona Ewro, inkluż lil Franza, biex jevitaw il-proċedura ta’ defiċit eċċessiv.

Il-Kummissjoni Ewropea għandha 20 ġurnata biex tressaq il-proposti lill-Kunsill Ewropew għas-sanzjonijiet kontra Spanja u l-Portugall. Wara, il-pajjiżi taż-żona Ewro (eskluż Spanja u l-Portugall) ikollhom għaxart ijiem biex jopponu l-adozzjoni tas-sanzjonijiet b’maġġoranza kwalifikata.

Qabel il-Kummissjoni tressaq il-proposti tagħha, Madrid u Lisbona għandhom għaxart ijiem biex jiddikjaraw il-pożizzjoni tagħhom. Il-Portugall u Spanja qed jgħidu li d-deċiżjoni tal-ECOFIN ma qisitx l-isforzi li għamlu biex itejbu l-qagħda finanzjarja ta’ pajjiżhom.

Il-Ministru tal-Finanzi Franċiż Sapin qal li “Ma rridux nagħtu sinjal li ma baqax regoli, iżda ma rridux nissanzjonaw biex inkunu issanzjonajna”. Il-Ministru Malti Edward Scicluna qal li “Hemm linja irqiqa li tissepara bejn li ninjoraw ir-regoli u bejn li ninkoraġġixxu l-Ewroxettiċimu”.

Il-Kummissjarju għall-Ewro Valdis Dombrovskis qal li Spanja u l-Portugall naddfu l-finanzi pubbliċi ta’ pajjiżhom biex jagħtu nifs lill-ekonomija tagħhom. Il-KE se tinnota l-isforzi li saru u l-kriżi finanzjarja li kellhom iż-żewġ pajjiżi fl-aħħar snin qabel tieħu deċiżjoni.