STORJA TA’ SUĊĊESS

L-artist Għawdxi Christopher Saliba stieden lil Alfred Sant iżur il-Gallerija tal-Arti f’ART CUBE, fi Triq l-Imġarr ix-Xewkija Għawdex fejn jesebixxi x-xogħlijiet artistiċi tiegħu. Saliba bena reputazzjoni bħala wieħed mit-talenti awtentiċi li toffri l-gżira Għawdxija u minn dil-gżira qed ikollu suċċessi artistiċi u ekonomiċi bl-inizjattiva tiegħu li jiġbor ix-xogħlijiet tiegħu taħt saqaf wieħed.

“L-artisti Għawdxin jistħoqqilhom inkoraġġament biex jesebixxu x-xogħlijiet artistiċi tagħhom fl-Ewropa. It-toroq kollha li joħolqu opportunitajiet għal artisti li jgħixu fuq gżira fil-periferija tal-Ewropa għandhom jiġu kkonsidrati,” qal Alfred Sant.

Christopher Saliba kien wieħed minn erba’ artisti Għawdxin li f’Marzu li għadda ġew mistiedna mill-Ewroparlamentari Malti biex  jesebixxu xogħlijiet artistiċi dwar ir-realtajiet u l-aspirazzjonijiet Għawdxin fil-Parlament Ewropew.

Alfred Sant qal li l-esebizzjoni ‘Għawdex Iħaddan il-Bidla’ kienet waħda mill-isbaħ esperjenzi tiegħu fil-Parlament Ewropew.

Chris Saliba qal li l-fatt li artisti Għawdxin ġejjin minn gżira żgħira u fil-periferija tal-kontinent Ewropew, jixprunahom biex ikunu aktar kreattivi.