STRATEĠIJA GĦALL-BALKANI KOLLHA

Tnax-il pajjiż membru tal-UE, inkluż Malta, iddikjaraw li l-istrateġija għat-tkabbir tal-UE għandha tibqa’ mmexxija minn proċess u mhux minn data, għalkemm data isservi ta’ inkoraġġiment.  Dawn kienu qed jirreferu għall-applikazzjoni tas-Serbja u tal-Montenegro li jixtiequ jsiru membri sħaħ tal-UE. Din il-komunikazzjoni lill-UE kienet immexxija mill-Italja imma ffirmata wkoll minn Malta, Awstrija, Repubblika Ċeka, Estonja, Ungerija, Irlanda, Latvja, Litwanja, Polonja, Slovakkja u Slovenja.

Franza topponi wkoll din l-għaġġla u ma tixtieqx torbot l-Unjoni b’data.

L-Istati Membri tal-UE jixtiequ li l-Kummissjoni Ewropea jkollha strateġija għar-reġjun kollu tal-Balkani li jkopri s-sitt stati Balkani kollha għat-tkabbir li jmiss tal-Unjoni u mhux biss lill-pajjiżi li l-aktar għamlu progress fin-negozjati bħas-Serbja u l-Montenegro. L-istati membri jridu strateġija waħda għas-Serbja, il-Montenegro, Bosnja u Herzegovina, Kosovo, l-Albanija, u l-Maċedonja.

Numru ta’ stati membri ma jixtiqux li tingħata data lill-pajjiżi fin-negozjati tas-sħubija li qegħdin avvanzati biex isiru membri sħaħ tal-Unjoni Ewropea. Issemmiet is-sena 2025 bħala data kredibbli biex is-Serbja u l-Montenegro jissieħbu fl-Unjoni.