TAL-PN FAVUR L-ARMONIZZAZZJONI TAT-TAXXI

Il-membri tal-PN fil-Parlament Ewropew ivvotaw favur riżoluzzjoni dwar it-taxxi fl-Unjoni Ewropea li tgħid ċar u tond li għandha titneħħa regola tal-unanimita` tal-istati membri tal-UE biex tittieħed deċiżjoni b’maġġoranza kwalifikata dwar il-politika tat-tassazzjoni. B’hekk tkun tista’ titwettaq l-armonizzazzjoni tat-taxxi fl-Ewropa li tmur kontra l-interessi ta’ Malta. Dan qalu Alfred Sant fil-programm REALTÀ fuq PBS li żvela li fit-13 ta’ Diċembru 2017 tal-PN  ivvotaw favur ir-riżoluzzjoni tat-TAXE Committee fil-vot finali. Klawżola li daħlet f’din ir-riżoluzzjoni tgħid li l-vot ta’ unanimita` dwar il-politika tat-tassazzjoni għandha titneħħa.

“Mill-membri tal-Partit Popolari Ewropew David Casa, Roberta Metsola u Francis Zammit Dimech ivvotaw favur l-armonizzazzjoni tat-taxxi.” qal Alfred Sant lil Francis Zammit Dimech, li kien qed jirrappreżenta lill-PN fil-programm televisiv.

Alfred Sant qal li d-Delegazzjoni tal-Partit Soċjalista Malti ivvotat kontra din ir-Riżoluzzjoni.

“Zammit Dimech, Casa u Metsola ivvotaw favur l-armonizzazzjoni tat-taxxi. L-MEPs Laburisti Maltin kienu l-uniku tlieta mis-Soċjalisti li vvotaw kontra. Mill-popolari – intom ivvotajtu iva u kien hemm tlieta, erba’ ivvotaw kontra fosthom iċ-Ċiprijott Lefteris Christoforu u kien hemm anki Brian Hayes, Eks Ministru tal-Finanzi Irlandiż li astjena.”