TAN-NANNA AKTAR MINN ĦELU MANNA

Meta faqqgħet it-tieni gwerra dinjija fl-Ewropa fl-1939, Madame de Florian ta’ 23 sena kellha tabbanduna d-dar tagħha fiċ-ċentru ta’ Pariġi biex taħrab lit-truppi Ġermaniżi. Baqgħet tħallas il-kerha tal-appartament, imma qatt ma reġgħet daħlet ġo fih. Fl-2010 mietet fl-eta` ta’ 91 sena. Wara mewtha, il-familjari tagħha saru jafu li kellhom appartament fil-belt kapitali Franċiża u minnufih ikkuntattjaw irkantatur biex jagħtihom prezz għall-affarijiet abbandunati fl-appartament.

L-irkantatur ħa x-xokk ta’ ħajtu meta fetaħ il-bieb tal-appartament li kien ilu magħluq għal aktar minn 70 sena. Rifes fuq it-trab u l-għanqbud u beda jifli l-oġġetti. Sab għamara tal-bidu tal-1900 u kċina mimlija settijiet tal-porċellana. Ħaseb li kien qiegħed f’dinja tal-ħolm. Kien hemm xi pitturi li tniżżlu mill-ħitan, bħallikieku xi ħadd kien se joħodhom imma qatt ma rritorna lura għalihom. It-twaletta baqgħet kif kienet, bil-petne, mejkap u fwejjaħ – tistenna lil sidha li qatt ma ġie lura. F’rokna tad-dar instab soft toy ta’ mickey mouse. Imma l-iktar ħaġa li laqtet lil kulħadd kienet pittura ta’ mara sabiħa b’libsa roża. Il-mara fil-pittura kienet in-nanna tas-sid tal-appartament li qabel kienet is-sid tal-appartament hija wkoll. Stħarreġ minn hawn u staqsi minn hemm l-irkantatur sab li l-pittura kienet ta’ Giovanni Boldini, wieħed mill-pitturi l-aktar rinomati tal-perijodu magħruf bħala La Belle Époque. Il-pittura saret fl-1888, meta n-nanna kellha biss 24 sena. Inbiegħet f’irkant għas-somma ta’ $3 miljun dollaru. Għaliex il-mara li ħarbet mill-appartament fl-1939 baqgħet tħallas il-kerha mingħajr qatt ma marret lura baqa’ misteru. Żgur li dawk kollha li kienu involuti f’din l-avventura għexu esperjenza tal-ħolm.