TAS-SUD IRIDU AKTAR KOEŻJONI SOĊJALI U EKONOMIKA

Il-mexxejja tas-seba’ pajjiżi tas-Sud tal-Ewropa – Malta, Ċipru, Spanja, Franza, Greċja, Italja u Portugall – qablu li l-Unjoni għandha tirrispetta l-liġijiet nazzjonali dwar l-impjiegi u l-protezzjoni soċjali.

Id-dimensjoni soċjali tal-UE teħtieġ li ċ-ċittadini jkollhom post ċentrali fil-proġett Ewropew. Il-mexxejja saħqu li koordinament fl-edukazzjoni u s-sistemi tas-sigurta` soċjali jaħdmu favur koeżjoni soċjali.

Fil-laqgħa ta’ Madrid il-mexxejja tkellmu favur l-Unjoni Bankarja u s-suq wieħed tal-enerġija. Huma wiegħdu l-impenn tagħhom lejn ir-regoli tal-politika tal-kummerċ Ewropew ibbażat fuq is-suq ħieles u l-kompetizzjoni ġusta.

Fid-dikjarazzjoni ta’ Madrid il-mexxejja qablu dwar miżuri li jżidu s-sigurta` taċ-ċittadini Ewropej, li jinkludu l-protezzjoni tal-fruntieri u l-ġlieda kontra l-finanzjament tat-terroriżmu.

Il-pajjiżi tal-Mediterran qegħdin qalb l-influssi tal-immigranti u qablu li l-politika Ewropea dwar l-immigrazzjoni għandha tkun ibbażata fuq ir-responsabbilta` u s-solidarjeta`. Bħalissa l-leġislaturi Ewropej qed jaħdmu fuq reviżjoni tat-trattat ta’ Dublin.

Laqgħa oħra bejn il-mexxejja tal-Mediterran se ssir f’Ċipru.