TENSJONI BEJN VARSAVJA U BRUSSELL

Il-Kummissjoni Ewropea se tibda l-proċess biex tneħħi d-dritt tal-vot lil Polonja wara li sentejn ta’ djalogu ma wasslu għal ebda riżultat. Din tkun mossa bla preċedent u l-Kummissjoni Ewropea tkun qed tikkastiga lil Polonja talli kisret ir-regoli tad-drittijiet tal-bniedem u tal-valuri demokratiċi.

“It-tħassib tagħna kompla jikber. F’sentejn daħlu numru konsiderevoli ta’ liġijiet – tlettax b’kollox – li serjament jimminaw l-indipendenza tal-ġudikatura u s-separazzjoni tal-poter fil-Polonja. Jekk il-Gvern Pollakk ma jipposponix dawn ir-riformi fil-qrati, mhux se jkollna għażla ħlief li nneħħu d-dritt tal-vot lil Polonja.” qal il-Viċi President tal-Kummissjoni Ewropea Frans Timmermans.

Il-Prim Ministru ġdid Pollakk Mateusz Morawiecki se jiltaqa’ mal-President tal-Kummissjoni Ewropea Juncker fid-9 ta’ Jannar. “Id-djalogu bejn il-Kummissjoni u l-Polonja għandhom ikunu miftuħa u onesti u s-sovranita` tal-Polonja u l-idea ta’ Għaqda Ewropea jistgħu jkunu rikonċiljati.” qal Morawiecki.

Jekk il-mexxejja kollha tal-UE jaqblu, il-Polonja tara d-dritt tal-vot tagħha sospiż u tista’ titlef biljuni ta’ ewro f’għajnuna mill-UE. Iżda l-kastig xorta jista’ jiġi evitat jekk l-Ungerija, ħabiba kbira tal-Polonja, ma taqbilx ma’ din il-proċedura.

Kastig jew le, ir-relazzjonijiet bejn Varsavja u Brussell iddeterjoraw bil-kbir wara li kiseb il-poter il-Partit Konservattiv PiS fl-2015.