TĦASSIB MINĦABBA L-INFLAZZJONI NEGATTIVA

Il-Bank Ċentrali Ewropew irid janalizza l-għodod monetarji disponibbli f’kas li jkun hemm il-bżonn li jintervjeni b’mod aktar aggressiv. Waqt laqgħa li kellu f’pajjiżna, il-President tal-Bank Ċentrali Ewropew Mario Draghi qal li ‘mhux se nistennew u naraw x’jiġri’ iżda ‘se naħdmu u se niflu s-sitwazzjoni’. Il-fatturi li qed iżommu milli l-inflazzjoni titla’ qrib it-2% huma b’saħħithom u persistenti u għalhekk jeħtieġ li ssir analiżi dettaljata. Fuq din l-analiżi, flimkien mat-tbassir ekonomiku, jittieħdu deċiżjonijiet ġodda.

F’Settembru, ir-rata tal-inflazzjoni reġgħet kienet negattiva (-0.1%) minkejja li f’Marzu l-Bank Ċentrali Ewropew beda programm (quantitative easing) li fih kull xahar jixtri sa massimu ta’ €60 biljun f’ismha pubbliċi. Dan il-programm jibqa’ jtawwal sa Settembru tal-2016.

Minbarra li l-ammont massimu tax-xiri jista’ jiżdied, qed tingħata ħarsa wkoll lejn għodod ekonomiċi oħra li jeżistu fil-politika monetarja biex jintużaw bil-għan li titjieb is-sitwazzjoni.

Il-Bank Ċentrali Ewropew irrefera wkoll għall-kriżi tal-immigrazzjoni. L-influss ta’ refuġjati fl-Ewropa se jżid sewwa n-numru ta’ nies li jistgħu jaħdmu u dan se jwassal għal aktar investiment pubbliku fil-qasam tas-saħħa u l-edukazzjoni. ‘Min se jiffinanzja dawn l-investimenti?’ Staqsa Draghi. Hu qal li għadu kmieni biex wieħed ibassar x’effett se tħalli din il-kriżi fuq l-ekonomija taż-żona ewro.