TINSTAB SOLUZZJONI GĦALL-ORKESTRA TAŻ-ŻGĦAŻAGĦ TAL-UE

Il-Kummissjoni Ewropea aċċertat lill-Ewroparlamentari Alfred Sant li sabet soluzzjoni biex l-Orkestra taż-Żgħażagħ tal-Unjoni (EUYO)  tibqa’ għaddejja bl-attivitajiet tagħha. Dan wara li l-UE kienet iddeċidiet li twaqqaf l-Orkestra f’Settembru minħabba nuqqas ta’ fondi. Dr Sant kien strumentali biex tkun rivokata d-deċiżjoni li ttieħdet f’Mejju u li permezz tagħha kienu se jinqatgħu l-fondi għall-Orkestra. Mużiċisti Maltin, li jagħmlu parti mill-Orkestra talbu lil Dr Sant biex jintervjeni għan-nom tagħhom biex il-Parlament Ewropew ibiddel din id-deċiżjoni. Dr Sant issieħeb ma’ għadd ta’ mużiċisti Maltin fl-20 ta’ Mejju quddiem it-Teatru Rjal, il-Belt Valletta li ma’ mużiċisti oħra madwar fi bliet Ewropej daqqew l-Innu Ewropew bħala turija ta’ solidarjeta` internazzjonali.

Dr Sant ħa l-inizjattiva biex jiġbor il-firem ta’ Ewroparlamentari oħra minn gruppi politiċi differenti fil-Parlament Ewropew. Dan biex jagħmel pressjoni fuq il-Kummissjoni Ewropea fuq din il-kwistjoni. Dr Sant staqsa lil Kummissjoni Ewropea li fid-dawl tal-fatt li l-Orkestra falliet fit-tentattiv li tikseb fondi fil-qafas tal-programm ta’ finanzjament tal-UE Ewropa Kreattiva, kellhiex pjanijiet biex tipprovdi sors alternattiv ta’ finanzjament sabiex tiżgura s-sopravivenza tal-Orkestra taż-Żgħażagħ tal-UE. Tul is-snin l-Orkestra kienet ta’ suċċess billi ġabet flimkien żgħażagħ mit-28 Stat Membru tal-UE biex jesprimu l-unità Ewropea bl-espressjoni mużikali. Il-Mistoqsija Parlamentari ta’ Dr Sant kienet iffirmata minn 23 Ewroparlamentari minn gruppi politiċi differenti fosthom l-Ewroparlamentari Maltin Marlene Mizzi (S&D), Miriam Dalli (S&D) u David Casa (PPE).

Il-Kummissarju Tibor Navracsics qal lil Dr Sant li meta l-Kummissjoni saret taf bil-problemi finanzjarji li kienet għaddejja minnhom l-Orkestra, il-Kummissjoni sabet soluzzjoni li permezz tagħha l-Orkestra taż-Żgħażagħ tal-Unjoni Ewropea se tkun tista’ tissokta bl-attivitajiet tagħha. Il-Kummissjoni qalet li qed isserraħ fuq l-impenn tal-Orkestra f’dawn iż-żminijiet ta’ sfida biex tadatta l-attivitajiet tagħha sabiex jirriflettu aħjar ir-rwol “Ewropew” tagħha u biex ixxerred l-ispirtu Ewropew ta’ libertà, kreattività u ftuħ fl-Ewropa u għall-Ewropa.