TISSAĦĦAĦ IL-PARTNERSHIP BEJN L-IŻVIZZERA U L-UE

L-Iżvizzera u l-UE għaddejjin b’diskussjonijiet biex ikomplu jsaħħu r-relazzjonijiet bilaterali f’oqsma ġodda, l-aktar fil-qasam tal-enerġija, saħħa pubblika, l-agrikoltura u drittijiet dwar servizzi ta’ trasport. Iż-żewġ naħat qed jinnegozjaw ukoll ftehim biex isaħħu l-aċċess eżistenti għas-suq waħdieni Ewropew u biex isiru ftehimiet oħra f’oqsma oħra.

L-Iżvizzera u l-UE għandhom aktar minn 120 ftehim bilaterali bejniethom li jiftħu aċċess għas-swieq taż-żewġ naħat. Ftehimiet bilaterali oħra huma dwar parteċipazzjoni tal-Iżvizzera f’forom differenti ta’ kooperazzjoni mal-UE bħal immigrazzjoni, l-ażil u s-sigurta`.

Aktar minn 1.4 miljun ċittadin tal-UE jgħixu fl-Iżvizzera waqt li kuljum 320,000 ċittadin mill-UE jivvjaġġaw lejn l-Iżvizzera

Id-diskussjoni dwar il-Brexit tefgħet dawl ġdid dwar ir-relazzjonijiet tal-UE ma’ stati li mhumiex membri sħaħ tal-UE. Il-metodu Żvizzeru ta’ kooperazzjoni settur b’settur, imsejjaħ ‘il-mod bilaterali’, qed jitqies bħala wieħed mill-mudelli tal-UE biex ikollha ‘partnership’ ma’ stati mhux membri tal-UE li jkun jaqbel għaż-żewġ naħat.