TKABBIR EKONOMIKU POŻITTIV FL-2017

It-tkabbir ekonomiku fil-pajjiżi taż-żona ewro kollha se jkun pożittiv fl-2017 għall-ewwel darba mill-kriżi tal-2008. Dan ħareġ mit-tbassir ekonomiku tal-Kummissjoni Ewropea. Il-KE qed tirrakkomanda li l-ekonomija tibqa’ miexja fuq l-istess triq ta’ riformi. Dan minkejja l-inċertezzi li  jistgħu jġibu d-deċiżjonijiet ekonomiċi tal-amministrazzjoni ta’ Trump u r-riskji politiċi b’għadd ta’ elezzjonijiet fl-Olanda, Bulgarija, Franza, Ġermanja u forsi l-Italja.

Il-Kummissarju tal-Munita Ewro Valdis Dombrovskis qal li huwa importanti li r-riformi jkunu kostanti u li l-frott tat-tkabbir ikun mqassam b’mod ġust. Skont il-Kummissarju tal-Affarijiet Ekonomiċi u Monetarji Pierre Moscovici, l-effett pożittiv tat-tkabbir se jinħass permezz ta’ tnaqqis fir-rata tal-qgħad. Qal ukoll li l-konsum privat affettwa l-aktar it-tkabbir għax l-investiment għadu ma rkuprax sew. Id-differenza bejn stat u ieħor huwa konsiderevoli. L-akbar tkabbir mistenni jkun reġistrat fir-Rumanija (4.4%), il-Lussemburgu (4%) u Malta (3.7%). L-inqas rata ta’ tkabbir mistennija tkun reġistrata fl-Italja (0.9%).