TKOMPLI S-SAGA TAL-GLYPHOSATE

Il-Kummissjoni Ewropea se tlaqqa’ l-Kumitat tal-Appell fit-23/24 ta’ Ġunju dwar l-użu tal-bexx glyphosate. Il-glyphosate hija kimika użata fl-agrikoltura li filwaqt li toqtol il-ħaxix ħażin, tista’ tikkawża l-kanċer, fost effetti negattivi oħra.

L-Għaqda tal-Bdiewa Ewropej qed titlob biex il-bexx glyphosate ikun approvat fil-Kumitat tal-Appell għax tisħaq li ma hemm l-ebda bexx ieħor effettiv daqsu. L-Għaqda qalet li t-tneħħija ta’ dan il-prodott jaffettwa l-kompetittivita` tal-bdiewa Ewropej fis-swieq globali, speċjalment fis-suq taċ-ċereali. It-tneħħija tal-bexx mis-swieq Ewropej jaġevola pajjiżi terzi li jesportaw il-prodotti agrikoli tagħhom lis-suq Ewropew, u li xorta se jibqgħu jużaw dan il-bexx.

Diġa` ttieħdu diversi votazzjonijiet dwar l-estensjoni tal-awtorizzazzjoni ta’ dan il-bexx. L-aħħar waħda saret fis-6 ta’ Ġunju fejn il-Kummissjoni Ewropea pproponiet estensjoni ta’ sentejn, sakemm l-Aġenzija Ewropea tal-Prodotti Kimiċi tkompli tagħmel it-testijiet fuq il-kimika u l-effetti tagħha. Il-vot ma ġabx maġġoranza kwalifikata. 20 stat membru, li jammontaw għal 52% tal-popolazzjoni Ewropea vvutaw favur l-użu tal-bexx. Maġġoranza kwalifikata tinkiseb b’55%.  Malta biss ivvutat kontra l-użu ta’ dan il-bexx kontroversjali. Il-Ġermanja, Franza, l-Italja, il-Greċja, l-Awstrija, l-Portugall u l-Lussemburgu astjenew.