TRAFFIKANTI JAGĦMLU €1.4 BILJUN EWRO MIL-LIBJA BISS

It-trasport tal-immigranti sar negozju li jrendi tajjeb għat-traffikanti tal-persuni, li qed jagħmlu profitt ta’ €1.4 biljun ewro fil-Libja biss. Bil-profitti minn dan in-negozju t-traffikanti jikkontrollaw partijiet mil-Libja, jikkooperaw mat-terroristi u jkomplu jiddistabilizzaw il-pajjiż. Il-President tal-Kunsill tal-Unjoni Ewropea Tusk qal li dan in-negozju jeħtieġ jitkisser b’urġenza. Donald Tusk qed jipproponi li jsiru sanzjonijiet mill-Ġnus Magħquda kontra t-traffikanti tal-persuni. Is-sanzjonijiet jinkludu l-iffriżar tal-assi u projbizzjoni fuq l-ivvjaġġar.

Tusk qal li l-UE irnexxielha ttaffi ħafna mill-kriżi tal-immigrazzjoni fil-Lvant tal-Mediterran – minn 158, 000 fl-ewwel sitt xhur tal-2016 għal 9, 000 fl-ewwel sitt xhur tal-2017. Dan seħħ minħabba li l-UE kellha l-għajnuna ta’ pajjiżi stabbli li għenuha – sitwazzjoni li mhux issir mil-Libja fejn l-UE qed taġixxi waħedha.

Bħal’issa hemm pressjoni kbira fuq l-Italja li fl-ewwel sitt xhur tal-2017 fuq xtutha waslu mat-83, 000 immigrant, żieda ta’ 19% fuq l-istess perijodu fl-2016. Ħafna mill-immigranti jaqsmu mil-Libja . Ħafna huma tal-fehma li l-UE baqgħet ma sabitx soluzzjoni għal dal-fenomenu u stati membri tal-UE mhumiex jaqblux mal-proposti f’dal-qasam. Dil-fehma qed tkompli tinxtered aktar ma immigranti jaqsmu minn naħa għal oħra tal-Mediterran waqt li t-traffikanti tal-bnedmin ikomplu jistagħnew minn din l-industrija.