TRATTAMENT SPEĊJALI GĦAL GĦAWDEX FL-UNJONI EWROPEA

Għawdex jista’ jgawdi minn aktar fondi tal-Unjoni Ewropea li joħolqu proġetti u impjiegi ġodda għaż-żgħażagħ f’Għawdex. Jeħtieġ sforzi akbar biex ninkoraġġixxu aktar fondi tal-Unjoni Ewropea għal attivita` ekonomika ġdida f’Għawdex. L-ewwel priorita` trid tkun li l-politika Ewropea, għas-siwi ta’ Għawdex, taqbel mar-realtajiet Għawdxin. Għawdex jeħtieġ jingħata trattament speċjali fil-qasam tat-trasport, turiżmu, agrikoltura, industrija, artiġġjanat, industriji żgħar u medji, servizzi finanzjarji u appoġġ diġitali.

Dan qalu l-Ewroparlamenti Alfred Sant waqt il-Konferena ‘L-Aspirazzjonijiet tal-Għawdxin fl-Ewropa.’ Dr. Sant qal li Għawdex jeħtieġ irawwem it-talent żagħżugħ tiegħu u joħloq proġetti ġodda f’Għawdex. ‘Irridu nreġġgħu lura li ż-żgħażagħ ifittxu xogħol u jaħdmu Malta jew aktar ’il bogħod meta jispiċċaw l-istudji tagħhom. Dawn jeħtieġu impjiegi f’Għawdex. Jeħtieġu impjiegi vijabbli għalihom u għal oħrajn f’Għawdex. Għawdex għandu bżonn niċeċ ta’ attivitajiet li jinvolvu liż-żgħażagħ Għawdxin. Dan diġa` ġie propost fi proġett li jixraqlu kull suċċess. Tkun idea tajba jekk il-gvern jagħmel sforz żejjed fil-qasam tal-investiment biex jimmobilizza aktar fondi fi programmi oħra tal-UE, li jagħtu appoġġ lil proġetti ġodda.

‘Każ partikolari huwa l-programm INTERREG tal-Unjoni Ewropeali jagħti fondi lil proġetti fir-reġjuni periferali u gżejjer iżolati fl-Unjoni Ewropea. Dawn il-proġetti huma ko-finanzjati bejn ir-reġjuni u l-gżejjer u l-UE. Proġett tipiku jiswa madwar €3 miljun, 85% jitħallsu mill-UE u l-bqija mir-reġjuni permezz tal-gvernijiet ċentrali. Dawn il-proġetti jgħinu liż-żgħażagħ Għawdxin joħolqu proġetti ġodda f’Għawdex.’

Dr. Sant qal li jidher li għadna m’aħniex imħejjija biex nesplojtjaw il-possibilitajiet ta’ proġetti bħall-INTERREG. ‘Inwiegħed lill-Għawdxin li se nkompli ninkoraġġixxi inizjattivi ġodda fil-Parlament Ewropew u f’oqsma oħra biex iż-żgħażagħ f’Għawdex joħolqu proġetti żgħar li joħolqu impjiegi ġodda f’Għawdex.’