VINO VERITAS

Figuri li ppubblikat il-Kummissjoni Ewropa juru li l-ġabra tal-għeneb fl-Italja se taqbeż lil dik ta’ Franza. L-Italja se ssir l-ikbar produtriċi tal-inbid fl-Ewropa u għalhekk anki l-ikbar produtriċi fid-dinja kollha.

Skont il-kalkoli tal-Kummissjoni, li bbażat il-figuri tagħha fuq dawk mogħtija lilha mill-istati membri, il-produzzjoni tal-inbid għas-sena 2015-2016 se tkun ta’ 170.7 miljun ettolitru (ettolitru jfisser mitt litru), żieda ta’ 2.9% fuq is-sena 2014-2015.

L-Italja tipproduċi l-ikbar numru b’50.3 miljun ettolitru (żieda ta’ 13.4%), ħafna aktar minn Franza (46.4 miljun ettolitru, tnaqqis ta’ 1%) u Spanja (42 miljun ettolitru, tnaqqis ta’ 2.3%).

Differenza ewlenija bejn l-inbejjed Taljani u dawk Franċiżi hija l-għenba. Fi Franza l-aktar għenbiet popolari jinkludu l-Cabernet Sauvignon, Merlot, Chardonnay, Grenache, Syrah u Pinot Noir. Fl-Italja fost l-aktar għeneb popolari nsibu s-Sangiovese, Pinot Grigio, Moscato, Nebbiolo, Chianti, Barolo, Valpolicella u Barbera. L-Italja waħedha għandha aktar minn 350 varjetajiet ta’ għeneb differenti.

Minbarra differenzi fil-ħamrija u l-klima li jaffettwaw it-togħma tal-għenba u minbarra d-differenza fil-varjetajiet, differenza oħra hija fl-istil tal-inbid. Franċiża jew Taljana, tazza nbid hija tajba għas-saħħa u tinżel għasel, kemm waħedha u kemm ma’ xi ikla tajba f’kumpanija pjaċevoli.