XARABANK BLA XUFIER

Tiftakarhom il-karozzi li jimxu waħedhom, mingħajr xufier, forsi f’xi film tal-biża’ jew f’xi cartoons ta’ Scooby-doo? Fid-dinja teknoloġika tal-lum, il-karozzi bla xufier saru realta`.

Fil-belt kapitali tal-Finlandja Helsinki għaddej proġett pilota li se jibqa’ sejjer sa nofs Settembru u li qed jittestja din it-teknoloġija ġdida. Il-proġett jikkonsisti minn 2 xarabanks li jaħdmu waħedhom mingħajr xufier. Ix-xarabanks jaħdmu bl-elettriku, jieħdu daqs 10 passiġġieri u jtellgħu veloċita` ta’ 40 km fis-siegħa. Ix-xarabanks għandhom erba’ sensors mpoġġija fuq l-erba’ kantunieri tax-xarabank biex iħossu l-ostakli. Għalissa mhux se jkollhom impatt fuq it-traffiku imma l-ħsieb huwa li jnaqqsu mit-traffiku billi jaħdmu flimkien mat-trasport pubbliku f’rotot li huma popolari.

Il-karozzi nħolqu minn kumpanija Franċiża,  iżda ċ-Ċina qed tippjana li tibda produzzjoni tal-massa ta’ karozzi simili fi żmien 5 snin. L-Istati Uniti wkoll qed titħajjar twettaq proġetti simili. Il-futur huwa f’idejn it-teknoloġija.