X’EFFETT IĦALLI BREXIT FUQ MALTA?

Rapport ta’ S&P jgħid li Malta, l-Irlanda u Ċipru, tliet gżejjer b’konnessjonijiet storiċi mar-Renju Unit, ikunu partikolarment affettwati bil-ħruġ tar-Renju Unit mill-UE. S&P ibbaża l-analiżi tiegħu fuq erba’ pilastri tar-relazzjonijiet tar-Renju Unit u s-sieħba internazzjonali tiegħu:  l-esportazzjoni, finanzi, investiment dirett barrani u immigrazzjoni. Il-Lussemburgu wkoll iħoss l-impatt tal-BREXIT minħabba l-importanza tas-servizzi finanzjarji fl-ekonomija tal-pajjiż. Ir-rapport jgħid li t-tliet pajjiżi gżejjer iħossu l-effetti negattivi minħabba spejjeż ogħla ta’ esportazzjoni u l-possibilita` ta’ anqas investiment dirett Brittanniku.

Dan ir-rapport ħareġ fl-istess waqt li żdied il-paniku f’Downing Street meta bdew joħorġu r-riżultati tal-istħarriġ tal-opinjoni pubblika fir-Referendum tat-23 ta’ Ġunju. Il-gvern Ingliż qed iżid id-doża biex jikkonvinċi lill-elettorat jibqa’ fi ħdan l-UE. Sa issa ż-żewġ movimenti kienu kważi ras imb’ras bil-miżien ġie jxaqleb lejn dawk li jridu joħorġu mill-UE.

Ir-rapport juri li Malta hija waħda mill-aktar pajjiżi li l-aktar qed tfittex tagħrif online dwar l-effetti li jista’ jħalli BREXIT fuqha.  Fl-aħħar jiem f’Malta u f’Għawdex l-attenzjoni pubblika kompliet tiffoka aktar fuq dan ir-Referendum.  Ħafna qegħdin jistaqsu x’jaqblilha Malta? Li r-Renju Unit jibqa’ membru fl-UE jew li joħroġ mill-UE?

Bir-Renju Unit barra mill-UE, żgur li r-relazzjonijiet kummerċjali bejn l-UE u r-Renju Unit ma jibqgħux daqstant b’saħħithom, għall-anqas għall-bidu. Żgur li għall-ewwel, l-ekonomija Maltija tkun affettwata, l-aktar it-turiżmu Ingliż lejn pajjiżna.

Bil-ħruġ tar-Renju Unit mill-UE, tonqos is-saħħa politika favur is-settur tas-servizzi finanzjarji liberali kif nafuhom sa issa. Malta għandha interessi simili għal dawk tar-Renju Unit, bħal fit-tmexxija tal-VAT. L-appoġġ tar-Renju Unit f’dawn l-oqsma żgur jinħass, l-aktar dwar l-argumenti li qed tressaq il-Kummissjoni Ewropea favur l-armonizzazzjoni tat-taxxi.

Il-Ġermanja u Franza ikomplu jkabbru l-influwenza tagħhom fuq il-politika Ewropea bin-nuqqas tar-Renju Unit. Dawn jimbuttaw aktar l-interessi tal-Ewropa Ċentrali bil-konsegwenza li jkomplu jikbru d-diverġenzi ekonomiċi li jeżistu bejn iċ-ċentru u s-Sud tal-Ewropa.

Irrispettivament x’jaqbel għal Malta, il-Brittanniċi se jiddeċiedu l-futur tagħhom u tal-Unjoni Ewropea. Il-Prim Ministru Ingliż Cameron issa nduna li anke l-Partit Laburista mhux se jiġbor il-voti mistennija minnu. Jista’ jkun li l-polls mhumiex jagħtu stampa veritjiera tal-opinjoni pubblika? Ħaġa waħda hi ċerta. Dan huwa l-ewwel pajjiż tal-UE li qed jagħmel referendum biex jiddeċiedi l-futur tiegħu fl-UE. Il-polls qed juru li kważi nofs il-popolazzjoni Brittannika trid titlaq mill-UE wara 43 sena ta’ sħubija fl-UE.

Unjoni Ewropea mingħajr ir-Renju Unit ma jaqbilx għal Malta