XEJN ĠDID DWAR IL-LVANT TAL-EWROPA

Waqt is-summit fuq il-Partnership bejn il-pajjiżi tal-Lvant – Armenia, Azerbaijan, Belarus, Georgia, Moldova u Ukraina – u l-mexxejja tal-pajjiżi tal-UE intlaħaq il-qbil li tiżdied il-kooperazzjoni u djalogu politiku biex ikunu indirizzati miri u sfidi komuni. Ma ssemma xejn dwar il-prospett ta’ sħubija fl-UE tal-Ukraina, Georgia u Moldova.

Id-dikjarazzjoni kienet ripetizzjoni tad-Dikjarazzjoni ta’ Summit f’Riga fl-2015 u tirrikonoxxi l-aspirazzjonijiet tal-pajjiżi tal-Lvant b’mod individwali – kull pajjiż jiddeċiedi hu l-miri u l-livell ta’ ambizzjoni li jixtieq fir-relazzjoni tiegħu mal-UE.

Il-Prim Minsitru tal-Lussemburgu Xavier Bettel qal li l-pajjiżi tal-kontinent Ewropew għandu jkollhom viżjoni li jidħlu fl-UE iżda “issa mhux il-waqt” li jingħaqdu pajjiżi ġodda.

Il-Ministru tal-Affarijiet Barranin tal-Belarus Vladimir Makei qal li l-pajjiżi tal-Lvant huma maqbudin f’battibekk bejn ir-Russja u l-UE u jixtieq li din il-konfrontazzjoni tispiċċa.

Il-kooperazzjoni mal-pajjiżi tal-Lvant u l-UE tiffoka l-aktar fuq erba’ oqsma – ekonomija, governanza, konnettivita` u infrastruttura.