XETTIKU DWAR IL-‘PROPOSTA TA’ KOMPROMESS’ TAL-UE GĦAT-TTIP

Il-Kap tad-Delegazzjoni Laburista fil-Parlament Ewropew qal li huwa xettiku mill-‘kompromessi’ li l-Kummissjoni Ewropea qed tagħmel dwar it-twaqqif ta’ tribunali speċjali li jkollhom il-poter jibdlu liġijiet tal-istati Ewropej biex jiġu aċċettati talbiet tal-kumpaniji multinazzjonali fuq il-ftehim ta’ kummerċ li qed jiġi negozjat bejn l-Unjoni Ewropea u l-Istati Uniti. Dr. Alfred Sant, li indirizza forum tal-‘Malta Business Bureau’ fil-Belt Valletta dwar il-ftehim kummerċjali bejn l-UE u l-Istati Uniti, tkellem dwar proposta ta’ kompromess li qed tagħmel il-Kummissjoni Ewropea li jkun hemm qorti speċjali magħmula minn Imħallfin mill-UE u mill-Istati Uniti u arbitri indipendenti biex tiddeċiedi dwar it-talbiet tal-kumpaniji multinazzjonali. ‘Jien wieħed minn dawk li huma ‘xettiċi’ dwar din il-proposta ta’ kompromess’, qal Dr. Sant.

Dr. Sant qal li l-biżgħa li se tkompli tiżdied is-saħħa tal-korporazzjonijiet multinazzjonali fis-swieq internazzjonali bil-ftehim kummerċjali bejn l-UE u l-Istati Uniti qed iżżid l-oġġezzjonijiet għall-mod kif l-Istati Uniti qed tipproponi li ssolvi kwistjonijiet li jinqalgħu bejn l-istati membri u l-investituri.

‘Bħalma jsir is-soltu fuq proposti biex ikun liberalizzat il-kummerċ u l-investiment, qed issir enfasi fuq il-benefiċċji tal-proposti. Waqt li qed issir il-kritika li l-aqwa li se jmorru tajjeb bil-ftehim tal-UE mal-Istati Uniti huma l-kumpaniji multinazzjonali, minn naħa l-oħra fl-aħħar xhur bdiet kampanja ta’ relazzjonijiet pubbliċi bl-enfasi li l-industriji żgħar u medji se jgawdu mill-ftehim bejn l-UE u l-Istati Uniti.

Dr. Sant qal li l-ftehim tal-kummerċ bejn l-UE u l-Istati Uniti se jkun qed iressaq proposti ġodda fil-mod kif iż-żewġ naħat isegwu l-operat tagħhom. ‘M’għandniex inkunu sorpriżi li qed jitressqu ċerti oġġezzjonijiet. Gruppi fl-Ewropa u fl-Istati Uniti qed jibżgħu li se jkunu eliminati proċeduri eżistenti fuq tħejjija ta’ ikel, testijiet fuq mediċini u l-esplorazzjoni tal-gass, kif ukoll li jintilef l-aċċess privileġġjat għal akkwisti pubbliċi fl-Istati Uniti u s-sussudji agrikoli fl-Ewropa.’ Qal Dr. Sant.

Il-laqgħa kienet indirizzata wkoll mill-MEPs Miriam Dalli u Roberta Metsola