X’INHUMA L-FONDI TERRITORJALI U X’INHU L-ITALJA/MALTA

L-Unjoni Ewropea għandha fondi maħsuba biex jintefqu bejn numru ta’ pajjiżi waqt ħidma jew proġett li jkunu qed jagħmlu flimkien. Allura, l-applikazzjoni għal dawn it-tip ta’ fondi ma tistax issir minn pajjiż wieħed biss. Biex il-Maltin jibbenefikaw minn dawn il-fondi, Malta trid iddaħħal l-applikazzjoni flimkien ma’ pajjiżi oħra.

Il-Fondi għall-programmi territorjali jsiru biex Malta tipparteċipa fi programmi partikolari flimkien ma’ pajjiżi oħra. Fost dawn insibu l-programm Italja/Malta, li kif jixhed l-isem stess, isir bejn partner Taljan, sewwa sew irid ikun Sqalli, u partner Malti. L-iskop huwa li jsiru proġetti bejn Malta u Sqallija li jiffaċilitaw il-komunikazzjoni bejn iż-żewġ gżejjer. Għan ieħor huwa l-qasam tar-riċerka u anki biex l-istati jaħdmu flimkien. Riċerka riċenti li saret bil-fondi territorjali taħt il-programm Italja/Malta kien jismu Respira. Permezz ta’ dan il-proġett saret riċerka fuq l-Ażma mid-dipartiment tas-saħħa. Il-proġett li sar bejn Sqallija u Malta ħareġ il-fatturi komuni li ż-żewġ pajjiżi għandhom fuq dan is-suġġett u ffoka dwar kif nistgħu ntejbu l-arja ta’ madwarna.