ŻBILANĊ FIL-KUMMERĊ BEJN L-UNJONI EWROPEA U Ċ-ĊINA

Grupp ta’ 30 assoċjazzjoni industrijali – Aegis Europe – urew tħassib dwar l-iżbilanċ enormi li l-Unjoni Ewropea għandha maċ-Ċina. Figuri riċenti tal-Uffiċċju tal-Istatistika tal-UE juru defiċit li din is-sena jilħaq il-€180 biljun.

Kull sena, id-defiċit kummerċjali tal-Unjoni Ewropea maċ-Ċina qed jiżdied b’mod konsistenti. Fl-2015 l-Unjoni Ewropea se tkun impurtat miċ-Ċina d-doppju ta’ dak li se tkun esportat lil dan il-pajjiż. Dan ifisser żieda fl-iżbilanċ ta €45 biljun fuq l-2014.

Aegis Europe qalet li l-ħbiberija maċ-Ċina mhux bilanċjata. Iċ-Ċina għandha pjan ekonomiku. Permezz ta’ dan il-pjan tissussidja l-industrija tagħha b’biljuni ta’ ewro u tagħmel tajjeb f’kas li l-prodotti esportati jiġrilhom xi ħaġa. Iċ-Ċina għandha pjan li tespandi u tikber aktar fl-Ewropa. Għalhekk l-Unjoni Ewropea għandha taċċerta ruħha li ċ-Ċina timxi mal-liġijiet internazzjonali tal-kummerċ.

Bħalissa l-gvernijiet Ewropej jimponu tariffi fuq l-importazzjoni miċ-Ċina u minn pajjiżi terzi oħra ġaladarba l-prezz tagħhom jitqies li jkun ħafna aktar baxx mill-valur tas-suq. Din it-tariffa tipproteġi l-merkanzija manifatturata fl-Ewropa. Iċ-Ċina trid li dawn it-tarrifi ma jibqgħux ikunu imposti fuq il-prodotti tagħha. Dan ifisser li fis-suq ikun hawn merkanzija bi prezzijiet baxxi ħafna. L-assoċjazzjonijiet tal-Industrija qed jgħidu li jekk jiġri hekk, l-industrija Ewropea taffaċċja kompetizzjoni inġusta miċ-Ċina li mbagħad se taffettwa s-settur tal-manifattura Ewropea.

Skont studju li sar mill-Istitut tal-Politika Ekonomika ta’ Washington, jekk titneħħa din it-tariffa, jistgħu jintilfu mal-3.5 miljun impjieg fl-UE. L-Ekonomija Ewropea ġġarrab telf li jlaħħaq 2% tal-Prodott Gross Domestiku. L-aktar pajjiżi li jintlaqtu huma l-Ġermanja, l-Italja, ir-Renju Unit, Franza u l-Polonja. L-aktar setturi li jintlaqtu se jkunu tal-ħadid, iċ-ċeramika, l-aluminjum, karti, ħġieġ, parts tal-karozzi u t-teknoloġija kimika u ambjentali. Dawn is-setturi kollha jagħmlu parti mill-Grupp tal-assoċjazzjonijiet industrijali – Aegis Europe. Is-setturi flimkien idawru mal-€500 biljun fi qligħ kull sena u joffru miljuni ta’ impjiegi fl-Unjoni Ewropea.