IS-SOĊJALISTI NIDEW IL-PILASTRU SOĊJALI EWROPEW

Il-kunċett tal-Pilastru Ewropew tad-drittijiet Soċjali nkiseb bl-isforzi kontinwi tas-Soċjalisti u Demokratiċi madwar l-Ewropa favur progress soċjali għall-Ewropej flimkien mal-miżuri tal-Kummissarji Soċjalisti favur il-Pilastru Soċjali Ewropew fl-aħħar tliet snin, qal Alfred Sant dwar id-Direttiva tal-Bilanċ fix-Xogħol. Dr Sant qal li kienet ġlieda diffiċli biex is-Soċjalisti u Demokratiċi jwasslu l-messaġġ tagħhom ħalli l-pilastru soċjali jiġi kkonfermat fuq livell Ewropew.

Fl-Ewropa hemm bżonn jitwettaq u jkun konsistenti il-pilastru soċjali favur il-ħaddiema, iż-żgħażagħ li huma bil-prekarjat, in-nisa li ħafna drabi jkunu żvantaġġjati, favur il-pensjonanti li qed iħossuhom żvantaġġjati kif qed jogħlew il-prezzijiet. Dawn huma kollha miżuri soċjali importanti li jridu jitwettqu bi kbir jekk l-Ewropa trid iżżomm kuxjenza soċjali. Fl-Ewropa ma għandhomx ikunu apprezzati biss il-kisbiet ekonomiċi iżda trid tingħata dimensjoni soċjali lill-politika tagħha. F’dawn l-aħħar snin l-Unjoni Ewropea bdiet titlef mill-pedamenti tagħha u ħafna avvanzi soċjali fuq livell Ewropew twaddbu lura minħabba l-politika ta’ awsterita` kkawżata mill-kriżi finanzjarja.

Dr Sant qal li llum qed ikun hemm kunsens fost il-partiti l-kbar fil-Parlament Ewropew favur il-pilastru soċjali u hemm miżuri oħra li qed jiġu ppjanati ovjament ikollhom jieqfu minħabba l-elezzjonijiet Ewropej. Fil-każ tad-direttiva li għadha kemm għaddiet ir-rapporteur kien membru tal-partit tal-popolari li ironikament fil-bidu kien kontra li naħdmu fuq il-pilastru soċjali.