TBASSIR EKONOMIKU POŻITTIV GĦAL MALTA MINKEJJA L-BREXIT

Kollox jindika li Brexit se jseħħ u l-Gvern Brittaniku irid jagħlaq in-negozjati mal-UE sal-aħħar ta’ Novembru.

“Kulħadd jixtieq divorzju bi ftehim.” qal Alfred Sant fil-Qawra.

Dr Sant qal li t-tbassir ekonomiku għal Malta għadu pożittiv għas-sentejn li ġejjin u mhux se jkun determinat minn negozjati dwar il-Brexit.  L-ekonomija Maltija issa hija bbażata l-aktar fuq is-servizzi finanzjarji u t-turiżmu, żewġ setturi li kontinwament iddefenda fil-Parlament Ewropew  anke wara li l-UE tefgħet għajnejha fuqhom fl-aħħar snin.

Dr Sant saħaq dwar l-importanza ta’ ftehim tat-traffiku bl-ajru bejn Malta u r-Renju Unit, settur importanti għat-turiżmu peress li 40% tat-turisti jiġu mir-Renju Unit.

“L-obbligi tal-Gvern Brittaniku lejn iċ-ċittadini Maltin mhumiex relatati mal-Brexit. L-arranġamenti bilaterali bejn Malta u r-Renju Unit se jibqgħu fis-seħħ. Brexit ma jaffettwax il-ftehim bilatareli li Malta għandha mar-Renju Unit dwar is-saħħa, it-trattament tal-morda fi sptarijiet Brittaniċi  u l-edukazzjoni, iżda se jiġu affettwati scholarships tal-UE għal studenti Maltin li jixtiequ jistudjaw fir-Renju Unit. Dawk li għandhom impjieg fir-Renju Unit mhux se jintlaqtu.

L-importazzjoni u l-esportazzjoni lejn ir-Renju Unit jiddependu mill-ftehim li se jintlaħaq mal-UE. Negozji żgħar jistgħu jintlaqtu minn dazji ġodda li jiġu introdotti fuq l-importazzjoni u l-esportazzjoni minn u lejn ir-Renju Unit, skont il-ftehim kummerċjali li jintlaħaq mal-UE.