MHUMIEX INKWETATI DWAR ID-DEJN TAL-GREĊJA

L-Istituzzjonijiet Ewropej qalu li ma hemmx raġuni għat-tħassib dwar il-vijabilita` tad-dejn Grieg wara li ġie żvelat dokument intern tal-Fond Monetarju Internazzjonali. F’dan id-dokument il-Fond Monetarju Internazzjonali bassar li d-dejn tal-Greċja jista’ jitla’ sa 275% tal-Prodott Gross Domestiku sal-2060. Sal-2020 din l-istituzzjoni tbassar li d-dejn tal-Greċja se jkun ta’ 170% tal-Prodott Gross Domestiku.

“Aħna nemmnu li l-piż tad-dejn tal-Greċja huwa taħt kontroll, jekk isiru r-riformi b’mod rigoruż, grazzi għas-self favorevoli li ngħatat il-Greċja” qalu sorsi viċin il-Kummissjoni Ewropea u żiedu jgħidu li d-deċiżjonijiet li ttieħdu għal Greċja se jnaqqsu d-dejn tal-pajjiż. Il-Kummissjoni Ewropea qalet li l-Ewropej wiegħdu li jappoġġjaw lill-Greċja u li se jaħfrulha parti mid-dejn ġaladarba jkun implimentat il-programm ta’ riformi.