JIPPRUVAW IWAQQFU L-IMMIGRAZZJONI MILL-AFRIKA TA’ FUQ

Il-Kummissjoni Ewropea qed tipproponi għadd ta’ miżuri biex titwaqqaf l-immigrazzjoni mil-Libja. Il-miżuri jinkludu tisħiħ tal-fruntieri tas-sud tal-Libja, taħriġ għal gwardji tal-kosta u għajnuna lill-pajjiżi ġirien tal-Libja bħat-Tuneżija, l-Alġerija u l-Eġittu. Il-Kummissjoni allokat €200 miljun għal dan il-għan. Dan wara li fl-2016 fl-Italja wasal in-numru rekord ta’ 181, 000 immigrant.

Is-sena l-oħra 5, 000 persuna mietu mgħarrqa fil-Mediterran. Mad-90% tal-immigranti jitilqu mil-Libja u ħafna minn dawn l-imwiet seħħew fl-ibħra territorjali Libjani. Ir-Rappreżentanta Għolja tal-Affarijiet Barranin tal-UE Federica Mogherini qalet li l-awtoritajiet Libjani jeħtieġ li jwaqqfu din is-sitwazzjoni. Hi wriet it-tħassib tagħha li l-miljuni allokati għat-taħriġ tal-gwardji tal-kosta Libjani jisparixxi mingħajr kontroll.

Is-sitwazzjoni politika fil-Libja għadha instabbli. Mogherini qalet li l-koperazzjoni mal-awtoritajiet Libjani qed isseħħ permezz tal-Prim Ministru Fayez al-Sarraj u mal-awtoritajiet lokali Libjani li għandhom konnessjoni diretta mal-poplu Libjan. Il-Kummissarju Ewropew għall-immigrazzjoni u l-Affarijiet Interni tal-UE qal li djalogu mal-Libja għadu diffiċli u s-sitwazzjoni għadha kkumplikata.

Il-Kummissjoni Ewropea qalet li trid issaħħaħ il-ġlieda kontra t-traffikanti tal-bnedmin iżda qalet ukoll li mal-Libja mhux se tagħmel arranġament simili bħal dak li sar mat-Turkija. Dan għaliex fil-fehma tagħha s-sitwazzjonijiet mhux komparabbli.