META L-ISTABBILITA` FIL-LIBJA?

L-UE aċċettat stedina tal-Ġnus Magħquda, l-Għaqda Afrikana u l-Lega Għarbija biex flimkien isegwu l-proċess għan-normalizzazzjoni fil-Libja bl-għajnuna tal-pajjiżi ġirien. Dan sar magħruf waqt laqgħa tal-Ministri tal-Affarijiet Barranin tal-UE li matulha l-Unjoni qalet li lesta żżid il-kooperazzjoni ekonomika mal-Libja.

‘Aħna lesti insegwu l-proċess biex ngħinu jkun hemm l-għaqda fil-Libja. Aħna ma rridux nimponu soluzzjonijiet. Il-kwistjoni tas-sovranita` hija kruċjali għal-Libjani’, stqarret Federica Mogherini nhar it-Tnejn fi tmiem il-Kunsill tal-Affarijiet Barranin.

Il-Ministri qablu li jkun hemm forza armata waħda fil-Libja taħt it-tmexxija tal-awtoritajiet ċivili, waqt li saħqu li ma teżistix soluzzjoni militari għall-konflitt. Intqal li l-UE kienet lesta tistudja l-possibilta` li tappoġġja l-Gwardja Presidenzjali fil-Libja. Franza u l-Italja diġa` huma involuti fit-taħriġ tal-Gwardja Libjana.

‘Il-Libja trid tkun magħquda mil-Lvant għall-Punent.  Il-mistoqsija kruċjali hi kif il-Ġeneral Khalifa Haftar ikun integrat fil-Gvern Libjan”, stqarr Boris Johnson. Jean Asselborn għal-Lussemburgu qal li mingħajr Haftar ma jkunx hemm stabbilita`. Haftar inħatar kap tal-Armata fil-Libja, b’armata ta’ 4000 suldat. Iżda Haftar baqa’ jirrifjuta li jopera taħt awtorita` ċivili.

L-istabbilita` fil-Libja hija wġigħ ta’ ras għall-kommunita` internazzjonali.  Diġa` rajna l-gruppi estremisti jimlew il-vojt li ħalliet it-tmexxija ta’ Gaddafi. Dal-ġens jixraqlu l-għajnuna kollha biex jikseb l-istabbilita` li tant hija meħtieġa għall-popli qribu u għall-kontinent Ewropew.