BOTTA DWAR IL-POLITIKA KUMMERĊJALI TA’ TRUMP

Mario Draghi, President tal-Bank Ċentrali Ewropew wissa kontra l-kontroll tas-settur finanzjarju u l-għeluq tal-fruntieri tal-kummerċ f’dik li qed tiġi interpretata bħala botta lill-Amministrazzjoni ġdida tal-President Amerikan Donald Trump. “Bħalissa qed naraw espansjoni monetarja, kważi kullimkien. Il-kriżijiet finanzjarji jiżviluppaw meta jkun hemm infiq żejjed u regoli finanzjarji”, qal Draghi, meta indirizza laqgħa tal-ECON nhar it-Tnejn.

Draghi esprima t-tħassib tiegħu fuq dikjarazzjonijiet favur politika protezzjonista. Huwa qal li l-UE hija msejsa fuq is-suq ħieles u talab għal prudenza biex wieħed jara x’se jiġri f’dan il-qasam.

Il-kummenti ta’ Draghi ġew ftit jiem wara s-Summit ta’ Malta fejn il-mexxejja tal-istati membri tkellmu dwar il-bżonn ta’ għaqda fir-rigward tar-relazzjonijiet mal-Istati Uniti. Il-President tal-Kunsill Donald Tusk aktar qabel kien iddeskriva lill-President Amerikan bħala ‘theddida’ għall-Unjoni Ewropea.