IL-BELĠJU JIPPREFERI AJRUPLANI TAL-ĠLIED AMERIKANI

Il-Belġju għażel li jixtri ajruplani tal-ġlied Amerikani flok dawk Ewropej, għażla li tat daqqa ta’ ħarta lill-industrija tal-gwerra Ewropea li t-tir tagħha huwa li tibni t-tagħmir tad-difiża fuq art Ewropea stess.  L-UE bdiet issaħħaħ l-istrateġija ta’ difiża tagħha minn wara l-Brexit u l-ħatra tal-President Donald Trump.

Il-Prim Ministru Belġjan Charles Michel ipprova jikkalma l-kritiċi tad-deċiżjoni tiegħu billi qal li pajjiżu se jixtri wkoll drones, frejġati, vetturi u tagħmir ieħor tal-gwerra “fi ħdan il-qafas tan-NATO u d-difiża Ewropea.”

“L-ajruplani u d-drones huma Amerikani, it-tagħmir l-ieħor huwa Ewropew,” qal Michel.

Il-Ministru tal-Affarijiet Barranin Belġjan Didier Reynders qal li l-offerta tal-Istati Uniti kienet aħjar fil-prezz u aħjar ukoll mil-lat operazzjonali.

B’din l-għażla l-konsorzju Ewropew li jinkludi kumpaniji minn diversi pajjiżi Ewropej baqa’ b’ħalqu xott.

Skont figuri tal-Pentagon l-Amerikani biegħu globalment mat-320 fighter jets F-35 kemm fl-Istati Uniti stess, kif ukoll fost oħrajn lil Israel u r-Renju Unit u issa anki lil Belġju.