Sa fl-aħħar id-diskussjonijiet bejn il-gvern Ingliż u l-Unjoni Ewropea dwar it-talba tal-gvern biex jibdel it-termini li taħthom qed titħaddem is-sħubija fl-Unjoni tar-Renju Unit jidher li ħadu r-rankatura. Matul il-ġimgħat l-Ewropej ilmentaw li għadhom jistennew eżattamant fhiex u b’liema mod il-gvern ta’ David Cameron ried jasal għall-bidliet li xtaq. Qalu bir-raġun, li ftit li xejn kienu ħarġu dettalji konkreti dwar x’qed jistennew l-Ingliżi. Sadattant kemm il-Prim Ministru Ingliż u kemm il-ministri tiegħu kienu daru l-kapitali Ewropej fejn sostnew it-talba tagħhom imma dejjem f’diskors ġenerali.
Sadattant ukoll ir-retorika politika fir-Renju Unit bdiet tiħrax. Il-kampanja ta’ dawk li jixtiequ li l-Gran Brittanja tħalli l-Unjoni Ewropea telqet u beda jkollha effett. Il-kriżi tal-immigrazzjoni tal-aħħar xhur tatha saħħa akbar. Fost sorsi Ewropej beda jidħol is-suspett li l-gvern Ingliż kien wara kollox qed ilesti għall-ħruġ tal-pajjiż mill-Unjoni. Biex jirribatti din l-impressjoni li xterdet kemm fost l-Ewropej u kemm fost l-Ingliżi nfushom, Cameron għamel interventi fil-publiku biex juri kemm jixtieq li l-Ingliżi jibqgħu membri sakemm l-interessi tagħhom, bħala pajjiż b’munita tiegħu u li ma jridx jidħol fiż-żona ewro, se jkunu imħarsa.
Din jidher li se tkun l-aqwa argument li fuqu li l-Ingliżi se jserrħu n-negozjati tagħhom. Għall-bidu donnhom kienu se jagħfsu biex isseħħ bidla fit-trattati tas-sħubija fl-Unjoni. Dan biex tippermettilhom ma jkunux marbutin li jsegwu miżuri li jwasslu għal sħubija dejjem akbar fl-Ewropa, fost punti oħra. Imma b’hekk, it-tmienja u għoxrin pajjiż membru tal-Unjoni kollha kien se jkollhom jirratifikaw it-trattat kif mibdul. Uħud minnhom riedu anki jorganizzaw referendum dwar hekk. Mhux biss il-biċċa kienet titwal imma l-possibiltà li l-ftehim milħuq jiġi miċħud kienet tibqa’ kbira. U l-gvern Ingliż hu wkoll marbut li s-sena d-dieħla jorganizza r-referendum tiegħu dwar jekk ir-Renju Unit għandux jibqa’ jew le fl-Unjoni.
Allura jidher li l-mira se tkun li jekk jintlaħaq ftehim, dan jieħu forma ta’ arranġament bejn ir-Renju Unit u l-membri l-oħra, bi qbil li meta jasal il-waqt li t-trattati tal-Unjoni jerġgħu jiġu emendati, l-arranġament li jilħqu, jidħol fit-testi l-ġodda. Diffiċli tgħid kemm in-negozjati se jaslu malajr. Diskussjonijiet tekniċi ilhom għaddejja xi xhur mingħajr iżda ma kien hemm stqarrija ċara u definittiva mill-gvern ta’ Cameron sa fejn eżatt irid jasal.
Jista’ jkun li din it-tattika tħaddmet minħabba li hemm kurrent qawwi anki fil-Partit Konservattiv biex l-Ingilterra toħroġ mill-Unjoni. Jekk dawk li jaħsbuha b’dal-mod isiru jafu kmieni wisq lejn fejn qed jimmira l-gvern, malajr jibdew jgħidu li dan mhux biżżejjed u jsaħħu l-kampanja tagħhom għall-ħruġ tar-Renju Unit. Fl-istess ħin, waqt li għaddej bin-negozjati, il-gvern la jista’ jgħid vi u lanqas va. Imma sakemm jasal għall-konklużjoni tad-diskussjonijiet (bit-tama li jiftiehem mal-Ewropej) il-kampanja tal-Brexit, li r-Renju Unit joħroġ, tkun kisbet vantaġġ qawwi fl-opinjoni pubblika.
IMMIGRANTI
In-negozjati mal-Ingliżi ma setgħux jaslu fi żmien agħar għall-Ewropej, imdamdma kif jinsabu bil-kriżi tal-immigrazzjoni. Din kien ilha ttektek bil-qawwi, imma sakemm kienet taffettwa lill-Italja, il-Greċja u Malta setgħet tiġi mpoġġija fil-ġenb. Issa li l-mewġa tal-immigrazzjoni faret minn kullimkien, il-pajjiżi membri tal-Unjoni qed jitħabtu biex jiftehmu bejniethom u biex jiskopru politika effettiva. Ma tantx qed jirnexxielhom f’dan. Iċ-ċifri jitkellmu waħidhom.
Aktar minn 800,000 immigrant waslu dis-sena sa issa fl-Unjoni Ewropea. Skont il-Kummissjoni Ewropea, 600,000 minnhom għaddew mill-Greċja. Wara ħafna battibekki, il-pajjiżi membri tal-Unjoni ftehmu li se jqassmu bejniethom 160,000 immigrant skont kwoti maħduma mal-Kummissjoni. Sa issa, bejniethom il-pajjiżi ħarġu offerti għal 1,418-il post fit-territorji tagħhom għall-immigranti. Sar ħafna kjass dil-ġimgħa għax fl-aħħar, 30 immigrant telqu mill-Greċja biex jintlaqgħu fil-Lussemburgu.
Jidher sew li ftit hemm ħeġġa biex il-pajjiżi jiftħu l-bibien tagħhom, minkejja d-deċiżjonijiet li ħadu. Politikament issikkata kif tinsab fil-politika interna tal-Ġermanja, il-kanċellier Merkel qalet li jekk il-Ġermanja tagħlaq il-fruntieri tagħha, tiskatta gwerra ġdida fil-Balkani.
Iffaċċjat bit-telqa tal-pajjiżi Ewropej meta jiġu biex iwettqu d-deċiżjonijiet meħuda fil-qasam tal-immigrazzjoni, il-President tal-Kunsill Ewropew Tusk iddeċieda li jsejjaħ summit ieħor tal-mexxejja, “informali” din id-darba, meta jkunu Malta aktar tard dax-xahar għal-laqgħa mal-mexxejja tal-pajjiżi Afrikani. Din tal-aħħar ukoll hi maħsuba biex iġġib qbil bejn Ewropej u Afrikani dwar kif se jitrażżnu l-kurrenti ta’ immigrazzjoni rregolari lejn l-Ewropa. Anki hawn, se tkun ħaġa tqila biex jinstab ftehim effettiv.
FRODI FIL-ĦUT
Issemmew fl-aħħar xhur numru ta’ każi fejn ditti u negozji fl-Ewropa (u barra minnha) użaw metodi kif iwasslu l-prodott tagħhom fuq is-suq u kif ibigħuh, li mhumiex aħjar minn frodi. Każ li ssemma’ dil-ġimgħa laqat qrib ħafna tal-istituzzjonijiet Ewropej. Jirrigwarda mal-mija u ħamsin mill-aqwa restoranti ta’ Brussell, fejn imorru jieklu ħafna mill-uffiċjali u politikanti l-aktar influwenti, li jżommu lill-Unjoni għaddejja. Anzi, issemmew ukoll l-istess canteens fil-Kummissjoni u tal-Parlament Ewropew fejn jitrejqu impjegati u viżitaturi.
Għaqda tal-konsumaturi għamlet investigazzjoni fost dawn l-istabbilimenti dwar il-ħut li kienu qed iservu. Instab li fil-maġġoranza kbira tagħhom – mal-95 fil-mija – qed jgħaddu ħut ta’ kwalità inferjuri jew ħut differenti minn dak li jipproponu, waqt li jiċċarġjaw il-prezz tal-ħut “it-tajjeb”. Per eżempju, iwegħduk li se jservuk tonn tal-Atlantiku jew tal-Mediterran, u minflok jagħtuk tonn tat-Tajlandja. Jew tordna bakkaljaw u jġibulek marlozz; tordna lingwata u bla ma jgħidulek iġibulek xi ħuta ċatta bħalha, mrobbija fil-Vjetnam f’kondizzjonijiet xejn iġjeniċi.
L-ironija f’dawn is-sejbiet hu li komplew jikkonfermaw, wara l-iskandli li qed jheżżu l-kumpanija tal-karozzi Volkswagen, kemm f’ħafna każi madwar l-Ewropa, id-difiża tal-konsumatur għadha dgħajfa. B’ċertu mod, l-istess sejbiet farrġu xi ftit forsi lill-produtturi tal-laħam aħmar. Fl-aħħar ġimgħat, dawn raw il-bejgħ tagħhom jaqla’ daqqa wara li ngħatat pubbliċità kbira lil stqarrija tal-Għaqda Dinjija tas-Saħħa dwar kif l-ikel fil-wisq tal-laħam aħmar, idabbarlek kanċer. Jekk dan hu minnu, talanqas meta qed tordna laħam aħmar f’restorant ta’ Brussell, se tkun żgur li qed tiekol lilu, mhux xi prodott ieħor.
Post a comment