ENERĠIJA NADIFA FIL-GŻEJJER TAL-UE

Il-Kummissjoni Ewropea flimkien ma’ 14-il pajjiż ieħor (Malta, Ċipru, Greċja, Italja, Portugall, Spanja, Kroazja, Danimarka, Svezja, Estonja, Finlandja, Franza, Ġermanja u Irlanda) nidew l-inizjattiva ‘Enerġija Nadifa għall-Gżejjer tal-UE’. Din l-inizjattiva għandha l-għan li tgħin lil madwar 2, 700 gżira li jinsabu fl-UE biex jagħmlu t-tranżizzjoni lejn l-użu ta’ enerġija nadifa.

Din l-inizjattiva tgħin lil gżejjer biex inaqqsu d-dipendenza tagħhom fuq l-importazzjoni tal-enerġija bħaż-żejt billi jagħmlu użu aħjar ta’ sorsi ta’ enerġija rinovabbli bħax-xemx u r-riħ. Dan għandu jinkiseb permezz ta’ sistemi innovattivi u moderni. L-inizjattiva se tara liema huma l-problemi komuni tal-gżejjer u se tibni fuq proġetti piloti. Parti mill-iskema għandha l-għan li tagħmel l-aċċess għal teknoloġiji moderni u għal fondi aktar faċli.

L-inizjattiva se toħloq forum fejn dawk interessati fil-bidla lejn l-enerġija nadifa fil-gżejjer tal-UE jaqsmu l-ideat u jagħtu l-appoġġ lil xulxin. B’hekk jinħoloq qafas stabbli għall-assistenza teknika.