L-EWROPEJ IRIDU KOOPERAZZJONI MAT-TURKIJA

Il-mexxejja Ewropej qalu lill-President Tork Recep Tayyip Erdogan li l-UE tixtieq tibqa’ tikkoopera ma’ Ankara. Dan minkejja li r-relazzjonijiet bejn l-UE u t-Turkija ddeterjoraw wara l-attentat kolp ta’ stat fit-Turkija f’Lulju tal-2016.

“L-UE u t-Turkija jridu u se jibqgħu jikkooperaw flimkien. Kwistjonijiet importanti b’interess komuni kienu diskussi fid-dettall f’atmosfera kostruttiva”, qal kelliem tal-Kummissjoni Ewropea. Il-President tal-Kunsill tal-UE Donald Tusk qal li poġġa l-kwistjoni tad-drittijiet umani fil-qalba tad-diskussjonijiet.

Fid-diskussjonijiet issemmiet l-importanza favur kooperazzjoni kontra t-terroriżmu, kif ukoll dwar il-ftehim bejn l-UE u t-Turkija rigward l-immigrazzjoni ffirmat f’Marzu tal-2016.

Erdogan kellu laqgħa ta’ 40 minuta mal-President tal-Kunsill tal-UE Donald Tusk u l-President tal-Kummissjoni Ewropea Jean-Claude Juncker. Wara kellu laqgħa oħra ta’ 30 minuta ma’ Juncker biss.