IR-RETTORIKA TA’ 30 SENA ILU M’GĦADHIEX TGĦODD GĦAL-LUM

L-Unjoni Ewropea trid tagħmel sforz politiku kbir ta’ konsolidament u telimina l-iżbilanċi reġjonali u nazzjonali fl-Unjoni Ewropea. B’dan il-mod biss l-Unjoni tista’ tikseb lura l-enerġija tal-ewwel tletin sena mit-twelid tagħha, qal Alfred Sant waqt dibattitu fil-Parlament Ewropew dwar id-Dikjarazzjoni ta’ Ruma li se tkun addottata din il-ġimgħa mill-mexxejja Ewropej.

“Fl-ewwel tletin sena, l-UE kisbet ħafna mill-għanijiet tagħha, l-aktar dak li tiżgura l-paċi fl-Ewropa tal-Punent permezz ta’ integrazzjoni ekonomika. Fit-tletin sena li ġew wara, l-UE kompliet tikber u trabbi għeruq fil-fond. Dan wassal għal staġnar u paraliżi parzjali. L-istrutturi l-ġodda ta’ għaqda u kontroll li nħolqu wrew li ma setgħux ilaħħqu mal-inkwiet politiku, ekonomiku u demografiku. Id-dikjarazzjoni ta’ Ruma għandha tagħraf din ir-realta`. Ir-rettorika ta’ 30 sena ilu m’għadhiex tagħmel sens illum.

Internament, il-proġett Ewropew sar jitmexxa minn prinċipji neoliberali. Miljuni ta’ ċittadini fl-UE jħossuhom maqtugħin mill-proġett Ewropew jew iħossuhom ostili lejh. L-aspettattivi tagħhom ta’ aktar sigurta` u livell ta’ għixien aħjar komplew iddgħajfu bl-awsterita` u bil-politika li ma indirizzatx il-prijoritajiet ta’ ħajjithom. Żdiedu d-diverġenzi ekonomiċi u soċjali bejn l-istati membri tal-UE.” saħaq Dr Sant.

Id-dikjarazzjoni ta’ Ruma tagħlaq perjodu ta’ riflessjoni li beda fi Bratislava, f’Settembru 2016, eżatt wara l-BREXIT.