ENERĠIJA NADIFA GĦALL-ĠŻEJJER TAL-UE

Il-Kummissjoni Ewropea approvat pjan preparatorju biex gżejjer fi stati membri tal-Unjoni Ewropea  jagħmlu l-bidla lejn il-ħolqien ta’ enerġija nadifa u juru s-soluzzjonijiet tagħhom fuq livell Ewropew. Il-KE ippubblikat l-ewwel rapport fuq l-implimentazzjoni ta’ ‘Azzjoni Preparatorja’ biex il-gżejjer jibdew jipproduċu l-elettriku tagħhom minn sorsi nodfa u jsiru awtonomi kemm jistgħu fil-provvista tal-enerġija.  Jekk jirnexxi dal-proġett isir strument permanenti tal-UE.

Il-proġett kien propost f’Awwissu li għadda minn Alfred Sant bl-appoġġ tal-Ewroparlamentari Kroat Tonino Picula (S&D) u l-Ewroparlamentari Sqalli Michele Giuffrida (S&D).

Il-Kummissjoni ppubblikat il-proġetti pilota u l-‘Azzjonijiet Preparatorji’ għall-baġit tal-UE tal-2017 fosthom id-dokument “Strengthening cooperation on climate action among islands within and beyond the EU through the creation of an island identity within the Global Covenant of Mayors.” Dan kien approvat bħala parti mill-baġit tal-2017 u se jkun implimentat f’perijodu ta’ sentejn.

Il-Kummissjoni se taħdem viċin l-awtoritajiet lokali ta’ stati membri u gżejjer bl-għan li l-inizjattiva tingħata spinta u timxi ’l quddiem. Se jitwaqqaf forum dwar il-ħolqien tal-enerġija fil-gżejjer Ewropej biex jinqasam l-għarfien u anki l-esperjenzi lill-gżejjer infushom.