JIPPOMPJA BILJUNI TA’ EWRO FL-EKONOMIJA EWROPEA

Il-Bank Ċentrali Ewropew (BĊE) ħabbar li se jestendi l-programm li jixtri kull xahar €80 biljun ta’ ċedoli ta’ self tal-gvernijiet. Il-programm li kellu jieqaf f’Marzu ta’ din is-sena se jkun estiż sa Diċembru 2017 u kull xahar il-BĊE se jkun qed jixtri sa €60 biljun. Il-President Mario Draghi qal li b’dan il-mod il-Bank Ċentrali Ewropew se jibqa’ jkollu preżenza konsistenti fis-swieq.

Draghi qal li dan il-programm jista’ jkun estiż u aġġustat skont il-bżonn. L-għan hu li l-inflazzjoni titla’ qrib it-2% u l-ekonomija taż-żona ewro tibqa’ tirpilja. Draghi  huwa konxju li s-settur ekonomiku għadu sensittiv u l-kamp politiku mimli inċertezza: “Ħares lejn il-kalendarju tal-elezzjonijiet li se jsiru fl-Ewropa, lejn il-livell ta’ tkabbir fil-kumplament tad-dinja u lejn ċerti swieq finanzjarji.” qal Draghi biex jiġġustifika d-determinazzjoni tal-BĊE li jkun ippreparat għal kull eventwalita`.

Il-programm tal-BĊE ippompja biljuni ta’ ewro fl-ekonomiji. Dan biex ifuru l-bejgħ u x-xiri, jogħlew il-prezzijiet u jiċċaqlaq l-investiment. Kif imbassar il-valur tal-ewro niżel meta mqabbel ma’ muniti oħra imma l-prezzijiet u l-investiment ftit li xejn iċċaqilqu. Għalkemm għadha sensittiva, l-ekonomija taż-żona ewro bdiet tirpilja, minkejja li bil-mod. Qed ikun imbassar li l-inflazzjoni għal din is-sena se tlaħħaq il-1.3%.