L-IMPJIEGI, L-IMMIGRAZZJONI U S-SIGURTA` L-AKTAR IMPORTANTI

45% tal-Ewropej jemmnu li l-qgħad huwa l-ikbar sfida li għandha l-Ewropa, skont stħarriġ tal-Eurobarometer li sar fit-28 stat membru. 36% semmew bħala l-ikbar sfida l-ġlieda kontra l-inugwaljanzi soċjali u l-immigrazzjoni filwaqt li 31% inkludew il-qasam tas-sigurta` fost il-prijoritajiet politiċi li għandha tħaddan l-Unjoni. Anki jekk 56% jemmnu li wliedhom se jkollhom ħajja aktar diffiċli minn tagħhom, 66% jikkonsidraw l-Ewropa bħala bażi ta’ stabilita` f’dinja mifnija bl-inkwiet. Tliet kwarti tan-nies intervistati fl-istħarriġ jemmnu li ċerti deċiżjonijiet politiċi għandhom jittieħdu fuq livell Ewropew. Dawn jinkludu deċiżjonijiet dwar miżuri kontra t-terroriżmu, il-valur tal-paċi u l-protezzjoni tal-ambjent.