F’BAĦAR WIEĦED

Il-Gvern Malti beda bil-ħidma tiegħu biex imexxi l-Presidenza tal-Kunsill tal-Unjoni Ewropea għas-sitt xhur li ġejjin. L-isfida li għandha quddiemha Malta bħala l-iżgħar pajjiż fil-Presidenza,  iġġib magħha responsabbiltajiet tekniċi, amministrattivi u politiċi. Il-Presidenza Maltija ħabtet ma’ żmenijiet ta’ inċertezzi politiċi u ekonomiċi. Matulha r-Renju Unit se tippreżenta t-talba tagħha biex toħroġ mill-UE. L-immigrazzjoni, it-terroriżmu, ir-relazzjonijiet mar-Russja, l-inċertezzi mal-Amministrazzjoni l-ġdida ta’ Trump żgur se jkomplu jżidu l-inċertezzi fil-kontinent Ewropew. In-negozjati mar-Renju Unit se jkunu kumplessi, biż-żewġ naħat jiddefendu l-interessi tagħhom. Importanti li dawn in-negozjati jiżviluppaw fl-interess taż-żewġ naħat u hawnhekk il-Presidenza Maltija se jkollha l-opportunita` li tagħti kontribut siewi.

Il-Gvern Malti għamilha ċara li f’dawn is-sitt xhur l-UE trid tkun impenjata b’ħidma realistika. Fil-Konferenza Stampa mal-President tal-Kummissjoni Ewropea f’Malta, il-Prim Ministru Malti għamilha ċara li l-immigrazzjoni se tkun fuq quddiem fl-aġenda tal-UE fis-sitt xhur li ġejjin. Muscat saħaq dwar il-ħtieġa ta’ strateġija fit-tul dwar l-immigrazzjoni, waqt li enfasizza l-ħtieġa ta’ kontrolli fuq il-fruntieri tal-Ewropa, kemm bil-baħar u fuq l-art. Il-Prim Ministru Malti saħaq ukoll li l-partiti politiċi estremisti jiffjorixxu jekk ma jirnexxilniex inkabbru l-ġid ekonomiku u niżguraw li l-ġid jitqassam b’mod ġust.

Juncker ukoll huwa tal-fehma li l-immigrazzjoni għandha tingħata l-piż li jixirqilha u wera l-konvinzjoni tiegħu li l-Gvern Malti jista’ jagħti l-kontribut biex jintlaħaq il-progress tant meħtieġ. “Ninsabu f’baħar wieħed u qed ngħumu fl-istess direzzjoni. Malta qed tagħti enfasi lid-dimensjoni soċjali tal-UE, ħafna aktar minn Presidenzi preċedenti”, qal Juncker li faħħar lill-Gvern Malti għall-mod eċċezzjonali li ħejja għal din il-Presidenza.

L-attivita` diplomatika bejn l-istati membri tal-UE tissokta fil-ġimgħat li ġejjin. Fit-3 ta’ Frar jiltaqgħu f’Malta l-kapijiet tal-membri stati tal-UE bit-tema ewlenija tkun l-importanza li ċ-ċittadini jerġgħu jiksbu l-fiduċja fl-Unjoni Ewropea li dis-sena qed tfakkar is-sittin sena mit-twaqqif tagħha f’Ruma. Ir-realta` hi li l-pajjiżi tal-UE jinsabu f’baħar wieħed quddiem l-isfidi politiċi, ekonomiċi u soċjali li se jkomplu jiżvolġu quddiemna f’din is-sena li għadna kemm bdejna. Azzjoni kollettiva bejn l-istati membri kollha biss tista’ tegħleb l-inċertezzi li ħakmu l-Ewropa fl-aħħar snin.