Problema Ewropea

It-tilwima diplomatika bejn Malta u l-Italja dwar l-immigranti maqbuda fuq l-‘Aquarius’ qajmet mill-ġdid il-kontroversja dwar l-immigrazzjoni. Il-Gvern Malti rrifjuta, bir-raġun, li jieħu l-immigranti għax saħaq li Malta qed tonora l-obbligi internazzjonali tagħha. Din kienet l-ewwel mossa tal-Ministru tal-Intern il-ġdid Taljan Matteo Salvini biex jipprova jagħmel pressjoni fuq Malta u taċċetta 629 immigrant li telqu mill-Afrika lejn l-Ewropa. Salvini qal li Malta ma setgħetx tibqa’ tħares in-naħa l-oħra.

Il-Kummissjoni Ewropea għamlet appell liż-żewġ pajjiżi biex isibu soluzzjoni bejniethom għal raġunijiet umanitarji. Ftit wara l-Gvern Spanjol fetaħ il-port ta’ Valencia biex jilqa’ lil dawn l-immigranti.

Il-Kummissjoni Ewropea ddeskriviet il-liġi internazzjonali bħala vaga u saħqet li r-responsabilita` biex jingħażel port taqa’ fuq il-pajjiż li jipprovdi u jikkoordina l-missjoni tas-salvataġġ. Ftehim formali bejn il-Gvern Malti u l-Gvern Taljan dwar l-operazzjoni ‘Mare Nostrum’ jgħid li d-dgħajjes li jsibu ruħhom f’ibħra Maltin kellhom ikunu diretti lejn portijiet Taljani.

Ir-rifjut tal-Gvern Taljan li jieħu l-immigranti kien ikkritikat bl-aħrax. Sergei Stanishev, President tas-Soċjalisti Ewropej iddeskriva d-deċiżjoni tal-Italja bħala ‘diżgustanti’. Id-delegazzjoni Franċiża fil-Parlament Ewropew qalet li l-Italja rreaġixxiet b’mod illegali. Il-Gvern Malti rringrazzja lil Gvern Spanjol ta’ Pedro Sánchez għal involviment tiegħu. “Irridu npoġġu madwar mejda u niżguraw li din il-kwistjoni ma tirrepetix ruħha. Din hija problema Ewropea” qal il-Prim Ministru Malti Joseph Muscat.

Fil-verita` il-problema li nqalgħet bejn Malta u l-Italja ma kinitx kwistjoni bilaterali, imma problema kontinentali li trid tiġi indirizzata mill-istati membri kollha tal-UE li jridu joqogħdu għall-politika Ewropea dwar l-immigrazzjoni.