AKTAR PLASTIK MINN ĦUT FIL-BAĦAR SAS-SENA 2050

Tbassir tal-esperti  jgħid li se jkun hemm aktar plastik fl-ibħra milli ħut sas-sena 2050. Dan qed iwassal biex l-UE tieħu miżuri li jipprovaw isalvaw l-ambjent. Liġi ġdida titlob lill-istati membri jiżguraw li sa tmiem l-2019 kull persuna ma tikkunsmax aktar minn 90 basket tal-plastik fis-sena. Sas-sena 2025 il-mira hi ta’ mhux aktar minn 40 basket fis-sena. Bħalissa fl-UE jintużaw 100 biljun basket tal-plastik fis-sena. Il-pajjiżi membri jagħżlu huma l-aħjar metodu biex inaqqsu dan il-konsum.

Il-basktijiet tal-plastik huma problematiċi għax isoddu l-viji tal-ilma u d-drenaġġ u jipprovdu art għammiela għal mard. Bosta annimali tal-baħar imutu minħabba li jkunu belgħu l-plastik.

Huwa stmat li 85% tat-tniġġis marittimu kollu huwa kkaġunat mill-plastik, nofs dan il-persentaġġ huma oġġetti tal-plastik li jintużaw darba bħal platti, tappijiet, fliexken u straws tal-plastik.

Rapport mill-NGO Seas At Risk svela li fit-28 stat membru ntremew 580 biljun loqma ta’ sigarett, 46 biljun flixkun tal-ilma u 36.4 biljun straw kull sena.

Il-Ġnus Magħquda qalet li 9% biss tad-9 biljun tunnellata tal-plastik maħluq ġie riċiklat.

Ir-rapport jisħaq li wieħed mill-aktar metodi effettivi biex jinqatgħu l-basktijiet tal-plastik huwa li jkunu projbiti.

Il-Kummissjoni Ewropea qed tirrevedi l-liġijiet diġa` eżistenti li jinkludu l-mira ta’ aktar riċiklaġġ, tnaqqis ta’ 10% tal-iskart li jispiċċa fil-landfills u l-obbligu li l-istati membri jiżguraw li materjal riċiklabbli ma jintremiex u jiġi wżat mill-ġdid. Mistennija wkoll taxxi għal manifatturi li se jkunu obbligati jħallsu parti mill-ispejjeż tar-riċiklaġġ. Ir-regoli l-ġodda jidħlu fis-seħħ 20 ġurnata wara li jkunu ppubblikati fil-ġurnal uffiċċjali tal-UE.