JANEZ JANŠA JERBAĦ L-ELEZZJONIJIET FI SLOVENJA

L-ex Prim Ministru Konservattiv tal-Islovenja Janez Janša rebaħ l-elezzjonijiet tal-pajjiż b’25% tal-voti mitfugħa favur il-partit tiegħu SDS. Il-Partit SDS huwa partit tal-lemin, magħruf bħala nazzjonalistiku u kontra l-immigrazzjoni.

Janša, ta’ 59 sena diġa` kien Prim Ministru darbtejn oħra. Din id-darba bbaża l-kampanja elettorali tiegħu dwar l-immigrazzjoni u l-biża’ ta’ invażjoni ta’ immigranti mir-rotta tal-Balkani.  Janša mexa fuq il-passi tal-kampanja elettorali tal-Prim Ministru Ungeriż Viktor Orbán li tah l-appoġġ tiegħu u stqarr li Janša “jiggarantixxi s-sopravivenza tal-poplu tal-Islovenja”.

Ir-riċerkatriċi Catherine Horel spjegat kif il-biża’ li poplu jisparixxi minħabba invażjoni ‘Musulmana’ hija sentiment li jinħass komuni mhux biss fl-Ungerija imma wkoll f’pajjiżi oħra tal-Ewropa Ċentrali u anki fl-Islovenja, fejn ċertu partiti politiċi qed jagħmlu kampanji sħaħ jużaw il-biża’ tal-għibien tal-identita` biex jakkwistaw il-voti.

Il-partit ta’ Janša (SDS) kiseb 25 siġġu. Il-partit taċ-ċentru xellug LMŠ, immexxi minn Marjan Šarec, ġie t-tieni b’12.7% u rebaħ 13-il siġġu filwaqt li l-Partit Soċjal Demokratiku ġie t-tielet b’10% tal-voti li jissarfu f’10 siġġijiet fil-parlament.

Bħalma ġara f’ħafna stati membri Ewropej, it-triq biex ikun ifformat gvern ta’ koalizzjoni se tkun iebsa u twila.