KUMMERĊ MAL-ISTATI UNITI U Ċ-ĊINA

Id-diskussjonijiet tal-UE mal-Istati Uniti dwar il-kummerċ mexjin b’ritmu tajjeb. L-UE tinsab f’taħdidiet mal-Istati Uniti biex tipprova tevita t-tariffi fuq l-importazzjoni tal-azzar u l-aluminju, u maċ-Ċina biex tinnegozja ftehim aħjar għall-kumpaniji Ewropej li jixtiequ jinvestu f’dan il-pajjiż.

“Qed ikollna diskussjonijiet tajbin ħafna. Is-sitwazzjoni hija aktar kalma issa milli kienet ġimagħtejn ilu”. qal il-Viċi-President tal-Kummissjoni Ewropea Jyrki Katainen, waqt li l-Istati Uniti u ċ-Ċina jinsabu f’xifer tilwima kummerċjali.

Il-Kummissjoni Ewropea għadha ma tafx hux se jirnexxielha teżenta l-UE mit-tariffi tal-Istati Uniti b’mod permanenti. S’issa l-eżenjoni hija temporanja. Il-President Amerikan issettja d-data tal-1 ta’ Mejju biex jintlaħaq ftehim dwar it-tariffi mal-UE.

Id-diskussjonijiet tal-KE ma’ Beijing biex jitjiebu l-kundizzjonijiet tal-kumpaniji Ewropej fis-suq tagħha staġnaw. Kemm Brussell kif ukoll Washington jgħidu li l-iżbilanċ kummerċjali li għandhom maċ-Ċina nħoloq mill-ostakli li kumpaniji jaffaċċjaw fuq territorju Ċiniż.

Il-kumpaniji Ewropej jilmentaw il-ħin kollu li sejjer għall-agħar l-ambjent tan-negozju fiċ-Ċina.

“Il-kummerċ bejn iż-żewġ naħat mhux ġust għax l-Ewropa hija kompletament miftuħa għan-negozju iżda ċ-Ċina mhix.” qal Katainen.

Il-Kummenti ta’ Katainen saru wara li l-President Ċiniż Xi Jinping wiegħed li jiftaħ l-ekonomija ta’ pajjiżu għall-investiment barrani u jnaqqas it-tariffi fuq l-importazzjoni. Xi Jinping qal li ċ-Ċina se tnaqqas sewwa t-tariffi fuq l-importazzjoni tal-karozzi u prodotti oħra. Sena ilu Xi Jinping kien għamel l-istess wegħda. Jidher iżda li issa ċ-Ċina tixtieq tnaqqas it-tensjoni kummerċjali mal-UE u tevita gwerra kummerċjali mal-Istati Uniti.