BIL-PIENA KAPITALI T-TURKIJA MA SSIRX MEMBRU TAL-UE

Il-Kumitat tal-Affarijiet Barranin tal-Parlament Ewropew qal li bl-introduzzjoni tal-piena kapitali, it-Turkija taqta’ ħesrem in-negozjati mal-UE. Wara l-attakki vjolenti fuq l-awtoritajiet demokratiċi permezz tal-attentat kolp ta’ stat, id-demokrazija trid tissaħħaħ mhux tiddgħajjef. L-introduzzjoni tal-piena kapitali tkun ostaklu għas-sħubija tat-Turkija fl-UE iżda l-Kumitat qal li l-UE għandha tagħti daqqa t’id lit-Turkija u lill-poplu Tork filwaqt li tibqa’ tisħaq fuq il-valuri u d-drittijiet umani.

Fuq il-kwistjoni tal-liberalizzazzjoni tal-Visa liċ-ċittadini Torok, il-Kummissjoni qalet li t-Turkija mhux se tingħata dan l-aċċess din is-sena. Iż-żewġ partijiet għandhom jirrispettaw il-wegħdiet li għamlu lil xulxin. It-Turkija wetqet 67 kriterju minn total ta’ 72. Wieħed mill-kriterji jisħaq fuq bdil fil-liġijiet dwar it-terroriżmu li s’issa ma ġiex onorat mit-Turkija.

Il-Kumitat tal-Affarijiet Barranin tal-Parlament Ewropew qal li l-kooperazzjoni mat-Turkija hija fl-interess tal-UE u ma għandhomx jittieħdu deċiżjonijiet ta’ malajr. Teżisti t-tentazzjoni li pajjiżi oħra jipprovaw jersqu qrib it-Turkija. Erdogan mistenni jiltaqa’ mal-President Russu Vladimir Putin fil-bidu ta’ Awwissu.