ĊEKI JAQILGĦU TLIET DARBIET AKTAR FIL-ĠERMANJA

Kumpaniji Ċeki fil-Lbiċ tal-pajjiż mhux qed isibu biżżejjed ħaddiema għax ir-residenti li jgħixu ħdejn il-fruntiera, jippreferu jmorru l-Ġermanja biex jaħdmu minħabba l-benefiċċji għat-tfal u pagi aħjar, ħafna drabi tliet darbiet ogħla mill-paga medja fir-Repubblika Ċeka.

Jekk ħaddiem Ċek iħallas in-national insurance Ġermaniża, awtomatikament għandu d-dritt jirċievi €194 għall-ewwel u anki għat-tieni wild kull xahar, irrispettivament mis-salarju. Is-somma tiżdied skont in-numru ta’ tfal u tittieħed anki jekk it-tfal ma jgħixux fuq art Ġermaniża. Is-‘single mothers’, minbarra l-pagament imsemmi fix-xahar jieħdu wkoll allowance ieħor apparti li l-kundizzjonijiet tax-xogħol fil-Ġermanja huma tajbin ħafna. Il-kumpaniji Ċeki ma jistgħux jikkompetu mal-kondizzjonijiet li joffru l-kumpaniji Ġermaniżi.

In-numru ta’ nies fl-UE li jgħixu u jaħdmu fi stat membru ieħor irdoppja mill-2008, b’total li jlaħħaq is-17-il miljun ruħ.