ERDOGAN : “L-UE GĦANDHA ŻŻOMM IL-KELMA TAGĦHA”

Il-President Tork Recep Tayyip Erdogan huwa favur sħubija sħiħa fl-UE u qal li t-Turkija mhux kuntenta b’għażliet differenti. Erdogan akkuża lill-UE li ibblokkat in-negozjati u qed timplika li n-nuqqas ta’ progress huwa tort tat-Turkija.

“Dan huwa inġust – kif inhu inġust li ċerti pajjiżi fl-UE qed joħolqu għażliet oħra għalina differenti mis-sħubija sħiħa. L-UE għandha “iżżomm mal-wegħdi” li għamlet lit-Turkija,” qal Erdogan.

L-Ambaxxatur Tork għall-UE Faruk Kaymakci qal li t-Turkija għadha bil-mira li ssir membru sħiħ. Kaymakci qal li ‘partnership’ privileġġjat mal-UE ma jkunx ġust għal pajjiżu.

“Proposta bħal din tkun immorali u indiċenti għat-Turkija.”

Kaymakci qal li s-sħubija sħiħa tat-Turkija hija kkomplikata, iżda “mingħajr ma nneħħu xejn mis-sħubija ta’ pajjiżi oħra, meta t-Turkija ssir membru tal-UE, il-kontribuzzjoni tagħha mhux se tkun l-istess bħas-sħubija ta’ pajjiżi oħra.”

L-Ambaxxatur Tork qal li huwa ottimist għas-summit bejn l-UE u t-Turkija f’Marzu li ġej fi Brussell jew Varna fil-Bulgarija. Dan is-summit jista’ joffri l-opportunita` li jkunu diskussi r-relazzjonijiet bilaterali u fih l-UE tista’ tapprova t-tieni ħlas mit-€3 biljuni mwiegħda lil Ankara fuq il-kwistjoni tal-immigrazzjoni.

Għalkemm il-Presidenza tal-Bulgarija tista’ taġevola d-djalogu bejn l-UE u t-Turkija, f’Lulju ta’ din is-sena l-affarijiet jistgħu jikkomplikaw ruħhom meta tibda l-Presidenza tal-Awstrija. Il-Kanċillier tal-Awstrija Sebastian Kurz hu kontra li jitkomplew in-negozjati tas-sħubija mat-Turkija.