MALTA GĦANDHA TKUN KAWTA F’INIZJATTIVI POLITIĊI ĠODDA FIŻ-ŻONA EWRO

Bħala riċevitur tal-politika taż-żona ewro, Malta ma għandhiex triq oħra ħlief dik li tkun kawta f’inizjattivi politiċi ġodda maħsuba għaż-żona ewro. Dawn l-inizjattivi fil-futur jistgħu jservu biex jenfasizzaw aktar ir-rwol ta’ riċevitur, filwaqt li jnaqqsu l-azzjonijiet awtonomi li jirriflettu ċ-ċirkostanzi speċjali tal-gżejjer Maltin, qal Alfred Sant dwar l-esperjenza ta’ Malta fiż-żona ewro organizzata mill-Istitut Malti tal-Management f’San Ġiljan

“Fi ħdan iż-żona ewro, Malta tista’ biss iġġarrab u mhux tfassal il-politika. Nemmen li ma tantx aħna aħjar miż-żmien meta konna parti integrali miż-żona tal-isterlina sa snin wara l-Indipendenza. Dan ma jfissirx li aħna pparalizzati meta naffaċċjaw l-għażliet li se jiġu fuqna. Ifisser li s-suċċess ekonomiku tagħna se jiddependi minn kemm se ninterpretaw tajjeb is-sitwazzjonijiet li se jinħolqu u kemm se jirnexxielna nbassru dak li se jseħħ b’mod korrett fi ħdan l-istrutturi li fihom jittieħdu d-deċiżjonijiet fiż-żona ewro.”

Dr Sant qal li jaqbel li l-Mekkaniżmu ta’ Stabilita` Ewropea jinbidel f’għamla ta’ Fond Monetarju Internazzjonali (FMI) għall-Ewropa. Dal-Fond jista’ jintuża flok l-Awtorita` li tissorvelja r-riżoluzzjoni tal-banek Ewropej.

Dr Sant tkellem kontra l-idea ta’ ministru tal-finanzi għaż-żona ewro bil-baġit tiegħu.

L-Ewroparlamentari qal li unjoni bankarja fi ħdan iż-żona ewro għandha tinkludi malajr skema ta’ depożitu tal-assigurazzjoni fuq skala Ewropea. Iżda qal li se jipposponi d-deċiżjoni tiegħu dwar għandux il-baġit tal-UE ikollu linja ta’ dħul u infiq li tkopri ż-żona ewro.

Dr Sant qal li għaxar snin ilu kien jemmen li kien ikun aktar prudenti li nassorbu l-konsegwenzi kollha tad-dħul fl-UE qabel ma’ nipprovaw nidħlu fiż-żona ewro. Pajjiżi bħall-Isvezja, Polonja u Ungerija għadhom jemmnu dan.

“La l-gvern ta’ dak iż-żmien kien determinat li jingħaqad maż-żona ewro, ma kienx jagħmel sens nikkontestaw din id-deċiżjoni u noħolqu tensjonijiet ġodda meta l-ekonomija diġa` kellha l-ħtieġa li tadatta għar-regoli kollha tal-UE.” qal Dr Sant.