BIEX IL-BANK MALTI TAL-IŻVILUPP JEĦLES MINN PIŻIJIET ŻEJDA

Alfred Sant talab lill-Kummissjoni Ewropea biex teżenta lill-Bank Malti tal-Iżvilupp minn  piżijiet amministrattivi u spejjeż żejda. Il-Bank Malti tal-Iżvilupp twaqqaf dan l-aħħar mill-Gvern biex iservi bħala istituzzjoni finanzjarja meta l-banek kummerċjali privati jonqsu mill-finanzjament, jew meta jkunu disponibbli għal finanzjament iżda ma joffrux it-termini normali tas-suq.

Dr Sant ippreżenta l-emenda lil Kummissjoni Ewropea għad-Direttiva tal-UE dwar entitajiet eżentati, kumpaniji finanzjarji varji, rimunerazzjoni, miżuri superviżorji u miżuri għall-ħarsien tal-kapital.

Il-Kummissjoni ppreżentat il-proposti tagħha għall-emenda dwar id-Direttiva tar-Rekwiżiti Kapitali f’Diċembru 2016, biex tiżgura li l-qafas regolatorju attwali jiġi applikat b’mod aktar proporzjonat, u għalhekk, uħud mir-rekwiżiti ta’ rapportaġġ u rekwiżiti kumplessi oħra relatati mal-kummerċ ma jkunux ta’ piż għal xi istituzzjonijiet finanzjarji, biex ma titnaqqsilhomx il-kapaċita` tagħhom li jiffinanzjaw l-ekonomija. Din l-emenda eżentat istituzzjonijiet ta’ kreditu fil-Kroazja u fl-Olanda mill-applikazzjoni minn spejjeż amministrattivi żejda. Il-Bank Malti tal-Iżvilupp ma kienx inkluż fl-emenda għax kien għadu ma twaqqafx.

Eżentazzjonijiet ġodda ta’ dan it-tip jistgħu jsiru biss b’mod individwali għal tip ta’ banek bħal dawk tal-iżvilupp pubbliku jew għas-settur sħiħ tal-kreditu ta’ stat membru.