FL-INTERESS TA’ GĦAWDEX DAQS TAL-PAJJIŻI L-KBAR

Alfred Sant qal li rridu niżguraw li d-deċiżjonijiet li jittieħdu fil-Parlament Ewropew fil-ħames snin li ġejjin ikunu ta’ benefiċċju għal Għawdex daqs kemm ikunu ta’ ġid għall-pajjiżi l-kbar tal-UE.  Irridu nisfruttaw l-iżviluppi ġodda fit-teknoloġija diġitali biex niftħu twieqi ġodda ta’ opportunitajiet għaż-żgħażagħ Għawdxin f’Għawdex bl-għodod diplomatiċi, ekonomiċi, soċjali kollha u bl-għajnuna diretta tal-Gvern Malti. B’hekk inkunu qed nilqgħu għall-iżvantaġġi tal-insularita` doppja ta’ Għawdex.  Kull opportunita` ta’ ġid għal Għawdex fl-Ewropa rridu nsarrfuha biex noħolqu l-ġid f’Għawdex.

Fl-Imġarr Għawdex Alfred Sant qal li prijorita`  ewlenija hija li nħarsu l-identita` ambjentali ta’ Għawdex waqt li ninkoraġġixxu u ngħinu inizjattivi taż-żgħażagħ Għawdxin biex jipproduċu prodotti Għawdxin.

Alfred Sant qal li huwa fiduċjuż li l-Gvern Malti se jinnegozja favur fondi għal Għawdex għall-Budget il-ġdid tal-UE u li se jinvoka miżuri ġodda li jkomplu jistimulaw l-ekonomija Għawdxija.”

Is-Sur Manuel Cuschieri qal li fil-Parlament Ewropew, Għawdex għandu bżonn vuċi soda li twassal xi jħossu u jixtiequ l-Għawdxin. Għawdex għandu bżonn politiċi ta’ esperjenza u ippreparati biżżejjed biex iġibu l-aqwa vantaġġi għal Għawdex u jtaffulna d-deċiżjonijiet negattivi li jistgħu jkunu ta’ detriment għal Għawdex. Manuel Cuschieri qal li persuna li tista’ tagħmel dan kollu f’isem Għawdex huwa Alfred Sant.

Il-Konferenza tmexxiet minn Dr Christian Zammit.