SPANJOLI ID F’ID MA’ ORBAN

Il-partit tal-lemin estrem Spanjol Vox irid jiddefendu l-Ewropa u n-nazzjonijiet tagħha minn dak li qed isejjaħ “globalizzazzjoni ta’ Merkel, Macron u Soros”.

Is-Segretarju Ġenerali ta’ VOX –    Javier Ortega Smith –  qed juża kliem li jixbaħ ħafna dak tal-Prim Ministru Ungeriż Viktor Orbán.  Dawn isostnu li l-multikulturaliżmu qed jeqred ir-ruħ Ewropea.

Orban jgħid li ż-żieda fl-immigrazzjoni fl-Ewropa fl-aħħar snin hija kollha tort tal-Kummissjoni Ewropea u b’mod partikolari tal-President Jean Claude Juncker u ta’ George Soros.

Vox mhux ikkunsidrat bħala partit ‘anti-Ewropa’ bħal partiti oħra tal-lemin estrem f’pajjiżi oħra.

Madanakollu Ortega Smith ikkritika l-burokrazija eċċessiva tal-UE u rrefera għall-ostilita` li qed iħossu l-votanti kontra l-Istituzzjonijiet.

L-Istħarriġ pubbliku qed juri li fl-elezzjonijiet Vox mhux biss se jidħol fil-Parlament Spanjol iżda se jerbaħ ukoll siġġijiet fil-Parlament Ewropew. Mhux ċar ma’ liema grupp politiku se jingħaqdu. Din tkun l-ewwel darba wara erbgħin sena li partit tal-lemin estrem jerġa’ jidħol fil-Parlament Spanjol.