FRANZA SE DDAHHAL €500 MILJUN FIS-SENA

Franza żdiedet mal-lista ta’ stati membri li telqu għal rashom u li se jdaħħlu taxxa għal kumpaniji diġitali. Dan wara li l-Ministru Franċiż Bruno Le Maire ħabbar li fi Franza l-liġi dieħla fis-seħħ fl-1 ta’ Jannar 2019.

Franza qalet li l-pjanijiet tagħha jmorru lil hinn minn dak propost fid-dibattiti tal-UE.

Filwaqt li l-liġijiet dwar it-tassazzjoni fuq livell Ewropew iridu qbil unanimu fil-Kunsill, diskussjonijiet bejn il-ministri tal-finanzi ma wasslu għal ebda ftehim.

Franza għandha sfida kbira minn dawk imsejħa ‘tal-ġakketta safra’ li qed joħolqu kaos fil-pajjiż. Fil-bidu dawn l-irvellijiet bdew minħabba żieda fil-prezz tal-petrol u diesel.

Id-deċiżjoni ta’ Le Maire qed tittieħed f’xenarju fejn l-iskuntentezza taċ-ċittadini Franċiżi għat-taxxi tal-fuel jeħtieġ li tittaffa u l-ġbir tat-taxxi jsir minn fuq min jista’ jħallas l-aktar.

“Il-flus qegħdin għand il-kumpaniji l-kbar, li jagħmlu profitti konsiderevoli bis-saħħa tal-konsumaturi Franċiżi.” qal Le Maire.

It-taxxa l-ġdida tista’  trendi €500 miljun fis-sena.