IĊ-ĊINA U R-RUSSJA MĦASSBIN DWAR L-AZZAR 

Iċ-Ċina u r-Russja mħassbin dwar l-investigazzjonijiet tal-UE dwar l-azzar importat. Ir-Russja qalet li l-UE qed timponi dazju eċċessiv fuq l-azzar. Iċ-Ċina qalet li ma hemmx biżżejjed evidenza biex l-UE twettaq investigazzjoni u li l-UE għandha terġa’ tikkonsidra r-riżultati tagħha.

L-UE qalet li ma taqbilx ma’ dawn iż-żewġ pajjiżi u li hija kunfidenti li l-investigazzjonijiet tagħha qed isiru skont ir-regoli tal-Organizzazzjoni Dinjija tal-Kummerċ (WTO).

Fi Frar ta’ din is-sena l-UE fetħet investigazzjoni dwar l-azzar miċ-Ċina u imponiet dazji temporanji biex tgħolli l-prezz kemm fuq azzar Ċiniż u anki fuq dak Russu.

F’Awwissu l-UE kkonfermat li applikat biex twettaq dazji permanenti fuq esportazzjonijiet Russi u Ċiniżi tal-azzar.

L-Industrija tal-azzar Ewropea għaddejja minn żmien diffiċli u ma tistax tikkompeti mal-prezzijiet baxxi taċ-Ċina u r-Russja li jaħdmu taħt kondizzjonijiet u regoli differenti minn dawk Ewropej. Skont ftehim li għamlet fis-snin ta’ qabel, l-UE kellha tneħħi d-dazju mill-prodotti tal-azzar minn dawn il-pajjiżi. Jekk tneħħi d-dazji l-industrija tal-azzar Ewropea tkun f’periklu li tikkollassa.