IL-MEDITERRAN PRIJORITA` GĦALL-PRESIDENZA MALTIJA

Il-Presidenza Maltija fil-Kunsill tal-Ewropa se tiffoka fuq il-kwistjonijiet marbuta mal-Mediterran qal il-Ministru tal-Affarijiet Barranin Malti George Vella. Malta se tipprova tiġbed l-attenzjoni tal-Unjoni fuq il-problemi tal-Mediterran bħall-immigrazzjoni, it-tibdil fil-klima u strateġija għat-tkabbir sostenibbli tal-ibħra.  Malta se tistieden lill-istati membri ġirien tagħha fl-Ewropa u l-pajjiżi tal-Afrika ta’ Fuq biex jiddiskutu suġġetti ta’ interess komuni bħall-aspirazzjonijiet taż-żgħażagħ fir-reġjun tal-Mediterran.

Il-Kummissarju Għoli tal-Affarijiet Barranin tal-UE qalet li kuntenta li l-Mediterran se jkun fiċ-ċentru tal-Presidenza Maltija. Mogherini qalet li l-Mediterran huwa baħar Ewropew, iżda huwa baħar li fuq kollox jgħaqqad żewġ kontinenti. Il-Presidenza Maltija tipprovdi l-opportunita` biex is-Sud tal-Ewropa jiddiskuti mhux biss l-immigrazzjoni iżda wkoll l-investiment u t-tkabbir għal din iż-żona.